ఐఫోన్‌ తయారీ కంపెనీలకు ప్రోత్సాహకాలు.. సబ్సిడీల కంటే పన్నుల ఆదాయమే అధికం: అశ్వినీ వైష్ణవ్‌

భారత్‌ను ప్రపంచ ఐఫోన్‌ తయారీ కేంద్రంగా తీర్చిదిద్దే లక్ష్యంతో కేంద్ర ప్రభుత్వం చర్యలు చేపడుతోంది. చైనాకు ప్రత్యామ్నాయంగా భారత్‌లో ఉత్పత్తి కేంద్రాలను ఏర్పాటు చేసేందుకు ఆసక్తి చూపుతున్న అంతర్జాతీయ కంపెనీలను ఆకర్షించేందుకు ప్రత్యేక ప్రోత్సాహకాలు అందిస్తోంది. అయితే, ఐఫోన్‌ తయారీ సంస్థలకు పన్ను చెల్లింపుదారుల డబ్బుతో సబ్సిడీలు ఇవ్వడం భారత ఆర్థిక వ్యవస్థపై భారం మోపే ప్రమాదం ఉందంటూ ఇటీవల అంతర్జాతీయ మీడియాలో కథనాలు వచ్చాయి. ఈ విమర్శలపై స్పందించిన కేంద్ర మంత్రి అశ్వినీ వైష్ణవ్‌.. మొబైల్‌ తయారీ రంగానికి ప్రభుత్వం అందించిన ప్రోత్సాహకాల కంటే ఆ రంగం ద్వారా వచ్చిన పన్నుల ఆదాయమే ఎక్కువని స్పష్టం చేశారు.

ఎలక్ట్రానిక్స్‌ తయారీ రంగం ద్వారా దేశంలో సుమారు 25 లక్షల మందికి ఉపాధి లభించిందని, వారిలో 12 లక్షల మంది మొబైల్‌ తయారీ విభాగంలో పనిచేస్తున్నారని అశ్వినీ వైష్ణవ్‌ తెలిపారు. మొబైల్‌ తయారీ ప్రోత్సాహకాల కింద కంపెనీలకు ప్రభుత్వం రూ.19,000 కోట్లు చెల్లించగా, ప్రత్యక్ష పన్నుల రూపంలో రూ.25,000 కోట్లు, జీఎస్టీ రూపంలో రూ.3 లక్షల కోట్లు వసూలైనట్లు పేర్కొన్నారు. మొత్తం పన్నుల ఆదాయం సుమారు రూ.3.25 లక్షల కోట్లకు చేరిందని చెప్పారు. మొబైల్‌ తయారీకి సంబంధించిన ఉత్పత్తి ఆధారిత ప్రోత్సాహక (PLI) పథకం ఆర్థిక వృద్ధితోపాటు ఉపాధి కల్పనలోనూ విజయవంతమైందని మంత్రి అభివర్ణించారు.