'ఏఐ సాక్షమ్‌’ను ప్రారంభించిన భట్టి విక్రమార్క

కృత్రిమ మేధస్సు (ఏఐ) వినియోగంతో ప్రభుత్వ సేవలు వేగంగా, పారదర్శకంగా ప్రజలకు చేరాలని తెలంగాణ ఉప ముఖ్యమంత్రి భట్టి విక్రమార్క అన్నారు. హైదరాబాద్‌లోని ఎంసీఆర్‌ హెచ్‌ఆర్‌డీలో ప్రణాళికా శాఖ సహకారంతో టీజీ మ్యాథ్‌ నిర్వహించిన ‘ఏఐ సాక్షమ్‌’ కార్యక్రమాన్ని ప్రారంభించిన సందర్భంగా ఆయన మాట్లాడారు. ప్రభుత్వ కార్యాలయాల్లో ఏఐ ద్వారా ఆదా అయ్యే సమయం ప్రజలకు మెరుగైన సేవల రూపంలో అందాలని, రైతులు, పింఛనుదారులు, సామాన్య పౌరులు తమ సమస్యల పరిష్కారం కోసం కార్యాలయాల చుట్టూ పదేపదే తిరిగే పరిస్థితి తగ్గాలని పేర్కొన్నారు. ప్రజల సమస్యలను సకాలంలో పరిష్కరించడమే ప్రభుత్వ పాలనలో ఏఐ విజయానికి ప్రధాన కొలమానమని స్పష్టం చేశారు.

ప్రజాధన వినియోగాన్ని విశ్లేషించడం, ప్రాజెక్టుల్లో జాప్యాలను గుర్తించడం, సంక్షేమ పథకాల అమలులో లోటుపాట్లను తెలుసుకోవడం, విద్యుత్‌ డిమాండ్‌ను అంచనా వేయడం వంటి అంశాల్లో ఏఐ ఉపయోగపడుతుందని భట్టి విక్రమార్క వివరించారు. అయితే, ఏఐ గుర్తించిన అసాధారణ ధోరణులను అక్రమాలకు ఆధారాలుగా పరిగణించరాదని, సమాచారాన్ని ధ్రువీకరించిన తర్వాతే నిర్ణయాలు తీసుకోవాలని సూచించారు. ప్రజల వ్యక్తిగత సమాచార భద్రత, ఏఐ ఆధారిత నిర్ణయాలపై మానవ పర్యవేక్షణ, తప్పులకు బాధ్యత వహించే అధికారుల గుర్తింపు తప్పనిసరని పేర్కొన్నారు. తొలుత చిన్నస్థాయి ప్రయోగాలు నిర్వహించి, వాటి ఫలితాలను అంచనా వేసిన తర్వాతే విస్తరించాలని సూచించారు. ఈ కార్యక్రమంలో ప్రణాళికా శాఖ కార్యదర్శి గౌరవ్‌ ఉప్పల్‌, ట్రాన్స్‌కో సీఎండీ కృష్ణ భాస్కర్‌, టీజీ మ్యాథ్‌ ఎండీ పూజ, ఎంసీఆర్‌ హెచ్‌ఆర్‌డీ డైరెక్టర్‌ జనరల్‌ శాంతికుమారి తదితరులు పాల్గొన్నారు.