షేక్ హసీనాకు బంగ్లాదేశ్ షాక్..

మాజీ ప్రధాని షేక్ హసీనా తనకు కొత్త పాస్‌పోర్టు, జాతీయ గుర్తింపు కార్డు జారీ చేయాలని బంగ్లాదేశ్ ప్రభుత్వాన్ని కోరినట్లు అవామీ లీగ్ వర్గాలు సోమవారం వెల్లడించాయి. డిసెంబరులో స్వదేశానికి తిరిగి వెళ్లాలనే ఉద్దేశంతో ఆమె ఈ విజ్ఞప్తి చేసినట్లు తెలిపాయి. అయితే హసీనా అభ్యర్థనను బంగ్లాదేశ్ ప్రభుత్వం తిరస్కరించింది. ఆమె డ్రామా చేస్తున్నారని, భారత ప్రభుత్వం ఆమెను తమకు అప్పగించాలని బంగ్లాదేశ్ విదేశాంగ శాఖ సహాయ మంత్రి హుమయూన్ కబీర్ వ్యాఖ్యానించారు. ఉగ్రవాదులకు పాస్‌పోర్టులు జారీ చేసే సంప్రదాయం తమ దేశంలో లేదని స్పష్టం చేశారు. 2024 ఆగస్టులో ప్రభుత్వ వ్యతిరేక జెన్‌జీ ఉద్యమం నేపథ్యంలో పదవి నుంచి దిగిపోయిన హసీనా అప్పటి నుంచి భారత్‌లో ఉంటున్నారు. అనంతరం ఏర్పాటైన మధ్యంతర ప్రభుత్వం ఆమె పాస్‌పోర్టు, జాతీయ గుర్తింపు కార్డును రద్దు చేసింది. ఈ నేపథ్యంలో భారత్‌లోని బంగ్లాదేశ్ హైకమిషన్‌కు తన న్యాయ ప్రతినిధి మ్యాట్రిక్స్ చాంబర్స్ ద్వారా కొత్త పత్రాల కోసం దరఖాస్తు చేసినట్లు సమాచారం.

మరోవైపు, షేక్ హసీనాకు స్వదేశానికి తిరిగి వచ్చే ఉద్దేశం లేదని బంగ్లాదేశ్ ప్రభుత్వం పేర్కొంది. ఆమె తిరిగి వస్తానంటూ చేస్తున్న ప్రకటనలు రాజకీయ విన్యాసంలో భాగమేనని చీఫ్ ప్రాసిక్యూటర్ మొహమ్మద్ అమీనుల్ ఇస్లాం వ్యాఖ్యానించారు. బంగ్లాదేశ్‌కు తిరిగి రావడానికి అవసరమైన న్యాయపరమైన చర్యలను హసీనా తీసుకోవడం లేదని తెలిపారు. కాగా, హసీనా పదవి నుంచి దిగిపోయిన తర్వాత నోబెల్ బహుమతి గ్రహీత మొహమ్మద్ యూనుస్ నేతృత్వంలో మధ్యంతర ప్రభుత్వం ఏర్పాటైంది. అనంతరం జరిగిన ఎన్నికల్లో బంగ్లాదేశ్ నేషనలిస్ట్ పార్టీ (బీఎన్‌పీ) విజయం సాధించడంతో తారిఖ్ రహమాన్ ప్రధానిగా బాధ్యతలు చేపట్టారు. ఆయన మాజీ ప్రధాని ఖాలిదా జియా కుమారుడు, హసీనాకు చిరకాల రాజకీయ ప్రత్యర్థి.