భారత్ సమ్మిట్‌తో తెలంగాణకు అంతర్జాతీయ నిపుణుల ఆలోచనలు: మంత్రి శ్రీధర్ బాబు

హైదరాబాద్‌లోని హైటెక్స్‌లో భారత్ సమ్మిట్‌ను నిర్వహించనున్నట్లు రాష్ట్ర పరిశ్రమల శాఖ మంత్రి శ్రీధర్ బాబు తెలిపారు. ప్రపంచ విధానాలు, మారుతున్న రాజకీయ పరిస్థితులు, అంతర్జాతీయ పరిణామాలపై ఈ సదస్సులో చర్చలు జరగనున్నాయని వెల్లడించారు. ప్రగతిశీల ఆలోచనా విధానాలను ముందుకు తీసుకెళ్లడమే సమ్మిట్ ప్రధాన లక్ష్యమని పేర్కొన్నారు. ప్రపంచవ్యాప్తంగా పలువురు నిపుణులు ఈ కార్యక్రమంలో పాల్గొననున్నట్లు చెప్పారు.

కాంగ్రెస్ అగ్రనేత రాహుల్ గాంధీ విజన్‌కు అనుగుణంగా భారత్ సమ్మిట్‌ను నిర్వహిస్తున్నట్లు శ్రీధర్ బాబు వివరించారు. అంతర్జాతీయ నిపుణులు, మేధావులు పంచుకునే ఆలోచనలు, సూచనలు తెలంగాణ అభివృద్ధికి ఉపయోగపడతాయని ఆశాభావం వ్యక్తం చేశారు. ప్రపంచ స్థాయి విధానాలు, నూతన ఆలోచనలను రాష్ట్రానికి అన్వయించుకునేందుకు ఈ సదస్సు మంచి వేదికగా నిలుస్తుందని తెలిపారు.