బ్యాంక్ ఆఫ్ బరోడాపై బీఆర్ శెట్టి సంచలన ఆరోపణలు

దేశంలోని ప్రముఖ ప్రభుత్వ రంగ బ్యాంకుల్లో ఒకటైన బ్యాంక్ ఆఫ్ బరోడాపై వ్యాపారవేత్త బీఆర్ శెట్టి భారీ నష్టపరిహారం దావా వేసినట్లు వార్తలు వెలువడ్డాయి. ఎన్ఎంసీ హెల్త్‌కేర్, యూఏఈ ఎక్స్ఛేంజ్ సంస్థల వ్యవస్థాపకుడైన శెట్టి బాంబే హైకోర్టులో సుమారు రూ.1.45 లక్షల కోట్ల పరిహారం కోరినట్లు సమాచారం. ఈ పరిణామంతో స్టాక్ మార్కెట్లో బ్యాంక్ ఆఫ్ బరోడా షేర్లు బుధవారం ఉదయం ట్రేడింగ్‌లో సుమారు 3 శాతం పడిపోయాయి. నిఫ్టీ 100 సూచీలో అత్యధికంగా నష్టపోయిన షేరుగా నిలిచాయి. తన గ్రూప్ కంపెనీల ఆర్థిక లావాదేవీల్లో జరిగిన అక్రమాల్లో బ్యాంకు పాత్ర ఉందని శెట్టి ఆరోపిస్తున్నారు.

ప్రత్యక్ష ఆర్థిక నష్టాలు, కోల్పోయిన వ్యాపార అవకాశాలు, ప్రతిష్టకు భంగం కలిగినందుకు మొత్తం 15 బిలియన్ డాలర్ల నష్టపరిహారంతో పాటు ఏటా 18 శాతం వడ్డీ చెల్లించాలని ఆయన కోరినట్లు సమాచారం. నకిలీ సప్లయర్ ఖాతాల ద్వారా నిధుల మళ్లింపు, మనీలాండరింగ్ హెచ్చరికలను పట్టించుకోకపోవడం, నకిలీ వ్యక్తిగత గ్యారెంటీలతో రుణాలు పొందడం వంటి ఆరోపణలను పిటిషన్‌లో ప్రస్తావించినట్లు తెలుస్తోంది. అయితే, ఈ ఆరోపణలను బ్యాంక్ ఆఫ్ బరోడా ఖండించింది. ఇప్పటివరకు కోర్టు నుంచి అధికారిక నోటీసులు అందలేదని, అందితే చట్టపరంగా పోరాడతామని తెలిపింది. బీఆర్ శెట్టి తమకు సుమారు రూ.2,800 కోట్లు బకాయిపడ్డారని, ఆ మొత్తాన్ని రాబట్టేందుకు భారత్‌తో పాటు యూఏఈలోనూ న్యాయపరమైన చర్యలు కొనసాగుతున్నాయని బ్యాంకు పేర్కొంది. పరిహారం దావా అనేది కేవలం డిమాండ్ మాత్రమేనని, నిరూపితమైన బాధ్యత కాదని స్పష్టం చేసింది.