కాళేశ్వరంపై ప్రత్యేక అసెంబ్లీ భేటీకి కేబినెట్‌ సిద్ధం

కాళేశ్వరం ప్రాజెక్టుపై చర్చించేందుకు ఈ నెల చివరి వారంలో రెండు రోజుల పాటు శాసనసభ ప్రత్యేక సమావేశాలు నిర్వహించాలని తెలంగాణ కేబినెట్‌ నిర్ణయించింది. మేడిగడ్డ బరాజ్‌ నుంచి నీటి తరలింపుపై బీఆర్‌ఎస్‌ చేస్తున్న ఆరోపణలను తిప్పికొట్టడమే ఈ సమావేశాల ప్రధాన ఉద్దేశంగా తెలుస్తోంది. ఈ నేపథ్యంలో ఎమ్మెల్యేలతో కలిసి వివిధ సాగునీటి ప్రాజెక్టులను సందర్శించాలని ముఖ్యమంత్రి రేవంత్‌రెడ్డి మంత్రులను ఆదేశించారు. ఉమ్మడి కరీంనగర్‌ జిల్లాకు చెందిన మంత్రులు మేడిగడ్డ బరాజ్‌ను సందర్శించాలని, దేవాదుల, సీతారామ ప్రాజెక్టులను సంబంధిత జిల్లాల మంత్రులు పరిశీలించాలని సూచించారు.

మేడిగడ్డ నుంచి నీటిని తరలించడంలో ఎదురవుతున్న ఆటంకాలు, దేవాదుల ప్రాజెక్టు ద్వారా రికార్డు స్థాయిలో గోదావరి జలాలను తరలిస్తున్న విషయాలను మంత్రులు ప్రజలకు వివరించనున్నారు. ఇదిలా ఉండగా, పురపాలక శాఖలో 886 కొత్త పోస్టుల భర్తీకి కేబినెట్‌ ఆమోదం తెలిపింది. మరోవైపు, రూ.5 లక్షల ఇందిరమ్మ జీవిత బీమా పథకాన్ని ఈ నెల 19న సిద్దిపేటలో ప్రారంభించేందుకు ప్రభుత్వం నిర్ణయించింది. సాగునీటి ప్రాజెక్టులపై ప్రజలకు వివరణ ఇవ్వడంతో పాటు సంక్షేమ కార్యక్రమాలను మరింత బలోపేతం చేసే దిశగా ప్రభుత్వం ఈ నిర్ణయాలు తీసుకుంది.