ఆయిల్‌ పామ్‌ రైతుల రక్షణకు దిగుమతి సుంకాన్ని పెంచాలి..కేంద్రానికి మంత్రి తుమ్మల విజ్ఞప్తి

దేశీయ ఆయిల్‌ పామ్‌ రైతుల ప్రయోజనాలను పరిరక్షించడమే ప్రభుత్వ ప్రధాన లక్ష్యమని తెలంగాణ వ్యవసాయ శాఖ మంత్రి తుమ్మల నాగేశ్వరరావు స్పష్టం చేశారు. విదేశాల నుంచి తక్కువ ధరకు క్రూడ్‌ పామాయిల్‌ దిగుమతి అవుతుండటంతో దేశీయ రైతులు నష్టపోయే ప్రమాదం ఉందని ఆయన ఆందోళన వ్యక్తం చేశారు. స్థానిక రైతుల ప్రయోజనాలను కాపాడేందుకు గతంలో 44 శాతంగా ఉన్న క్రూడ్‌ పామాయిల్‌ దిగుమతి సుంకాన్ని తిరిగి అదే స్థాయికి పెంచాలని కేంద్ర ప్రభుత్వాన్ని మరోసారి కోరారు.

ఆయిల్‌ పామ్‌ దిగుమతి సుంకాలపై తెలంగాణ ప్రభుత్వం వ్యక్తం చేసిన ఆందోళనలను పరిగణనలోకి తీసుకుంటామని కేంద్ర మంత్రి ప్రహ్లాద్‌ జోషి ఇటీవల లేఖ ద్వారా హామీ ఇచ్చినట్లు తుమ్మల వెల్లడించారు. క్రూడ్‌ పామాయిల్‌ దిగుమతి సుంకాన్ని కేంద్ర ప్రభుత్వం క్రమంగా తగ్గిస్తూ వచ్చిందని, ఈ ఏడాది సెప్టెంబరులో దానిని 11 శాతానికి తగ్గించిందని పేర్కొన్నారు. ఈ నేపథ్యంలో ప్రధానమంత్రి నరేంద్ర మోదీతో పాటు పలువురు కేంద్ర మంత్రులకు పలుమార్లు లేఖలు రాశానని, స్వయంగా కలిసి దేశీయ రైతులు ఎదుర్కొంటున్న సమస్యలను వివరించానని గురువారం విడుదల చేసిన ప్రకటనలో తుమ్మల తెలిపారు.