ప్రజల ఫిర్యాదుల పరిష్కారంలో నిర్లక్ష్యం వద్దు: సీఎం చంద్రబాబు

ప్రజలు సమర్పించే ఫిర్యాదుల పరిష్కారంలో ఎట్టి పరిస్థితుల్లోనూ నిర్లక్ష్యం వహించకూడదని ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు అధికారులను ఆదేశించారు. అమరావతిలోని సచివాలయంలో ఆర్టీజీఎస్‌ ద్వారా వివిధ శాఖల పనితీరును సమీక్షించిన ఆయన, క్షేత్రస్థాయిలో ప్రభుత్వ సేవలు ఎలా అందుతున్నాయో అడిగి తెలుసుకున్నారు. ప్రస్తుతం ప్రజా ఫిర్యాదుల పరిష్కార వ్యవస్థ (పీజీఆర్‌ఎస్‌) ద్వారా సమస్యలను పరిష్కరించగలుగుతున్నామని పేర్కొంటూ, ఈ ప్రక్రియను మరింత వేగంగా, సమర్థంగా నిర్వహించాలని సూచించారు. ఇందుకోసం జిల్లా కలెక్టర్లతో సమావేశం ఏర్పాటు చేయాలని ప్రభుత్వ ప్రధాన కార్యదర్శి సాయిప్రసాద్‌ను ఆదేశించారు.

175 అసెంబ్లీ నియోజకవర్గాల్లో నోడల్‌ అధికారులు స్వీకరించే ఫిర్యాదుల పరిష్కారంలో ఉద్యోగులు, అధికారులకు జవాబుదారీతనం ఉండాలని చంద్రబాబు స్పష్టం చేశారు. ప్రజల సమస్యలను సకాలంలో పరిష్కరించేలా నిరంతర పర్యవేక్షణ చేపట్టాలని సూచించారు. మరోవైపు, కొన్ని ప్రభుత్వ శాఖలపై దుష్ప్రచారం జరుగుతోందని, ముఖ్యంగా రెవెన్యూ శాఖ జారీ చేసిన జీవోను వక్రీకరిస్తూ ప్రజల్లో తప్పుడు అభిప్రాయాలు కలిగిస్తున్నారని ఆయన పేర్కొన్నారు. ఇలాంటి ప్రచారాన్ని ఎప్పటికప్పుడు గుర్తించి, వాస్తవ సమాచారంతో సమర్థంగా స్పందించాలని అధికారులకు సూచించారు. ఈ సమీక్షలో సీఎస్‌ సాయిప్రసాద్‌తో పాటు వివిధ శాఖల ఉన్నతాధికారులు పాల్గొన్నారు.