ఏఐతో చేసిన పీహెచ్‌డీ పరిశోధనలకు ఉస్మానియా చెక్

చాట్‌జీపీటీ, జెమినై వంటి ఏఐ సాధనాలను ఉపయోగించి పరిశోధన పత్రాలు సమర్పిస్తున్న పీహెచ్‌డీ విద్యార్థులపై ఉస్మానియా విశ్వవిద్యాలయం ప్రత్యేక దృష్టి సారించింది. పరిశోధన పూర్తిగా విద్యార్థుల సొంత కృషితో జరిగిందా లేదా అనే విషయాన్ని గుర్తించేందుకు ఆధునిక ప్లాగియారిజం సాఫ్ట్‌వేర్‌ను వినియోగిస్తోంది. అనుమానాస్పద థీసిస్‌లను తిరిగి సవరించి సమర్పించాలని విద్యార్థులకు సూచనలు జారీ చేస్తోంది.

గత ఏడాది జులై నుంచి టర్నిటిన్ సాఫ్ట్‌వేర్‌ను వినియోగిస్తున్న విశ్వవిద్యాలయం, కేవలం కొన్ని నిమిషాల్లోనే ఏఐ ఆధారిత కంటెంట్‌ను గుర్తించే సామర్థ్యాన్ని పెంచుకుంది. పరిశీలించిన అనేక థీసిస్‌లలో మార్పులు, చేర్పులు అవసరమని అధికారులు గుర్తించారు. పరిశోధనలో నైతిక ప్రమాణాలను పాటించకపోతే భవిష్యత్తులో పీహెచ్‌డీ అవకాశాలపై కూడా ప్రభావం పడే అవకాశం ఉందని విద్యార్థులకు హెచ్చరికలు జారీ చేశారు.