యువతను నిర్బంధిస్తున్నారంటూ బీజేపీపై సీజేపీ నేత అభిజీత్ దీప్కే ఆరోపణలు

అక్టోబర్ 10న ఢిల్లీలోని జంతర్ మంతర్ వద్ద నిర్వహించనున్న నిరసనకు ముందు దేశవ్యాప్తంగా వేలాది మంది యువకులను నిర్బంధిస్తున్నారంటూ కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కే ఆరోపించారు. ఈ మేరకు ఆయన సామాజిక మాధ్యమాల్లో ఒక పోస్ట్‌ చేశారు. నిరసనకారులను భయపెట్టి, ఆందోళనలో పాల్గొనకుండా అడ్డుకోవడమే ఈ చర్యల ఉద్దేశమని ఆయన ఆరోపించారు.

ప్రభుత్వ చర్యలతో యువత గొంతును అణచలేరని దీప్కే పేర్కొన్నారు. ఎన్ని సవాళ్లు ఎదురైనా అక్టోబర్ 10న ఢిల్లీకి చేరుకుని జంతర్ మంతర్ వరకు పాదయాత్ర చేస్తానని ప్రకటించారు. ఓటరు జాబితాల ప్రత్యేక సమగ్ర సవరణ (ఎస్‌ఐఆర్‌)పై నిరసనలు చేపడుతున్న సీజేపీ.. కేంద్ర ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తోంది. అయితే, దేశవ్యాప్తంగా వేలాది మంది యువకులను నిర్బంధించారన్న దీప్కే ఆరోపణలను స్వతంత్రంగా ధ్రువీకరించలేదు. నిరసనను కొనసాగిస్తామని పార్టీ స్పష్టం చేసింది.