ఈసీపై పోరుకు ఢిల్లీ బాట పట్టిన సీజేపీ నేతలు

ఎన్నికల సంఘానికి సంబంధించిన తాజా వివాదం నేపథ్యంలో సీజేపీ నేతలు అభిజీత్‌ దీప్కే, సౌరవ్‌ దాస్‌, ఆశుతోష్‌ రాంకా తమ షెడ్యూల్‌ కార్యక్రమాలను రద్దు చేసుకుని ఢిల్లీకి బయలుదేరుతున్నట్లు ప్రకటించారు. ఢిల్లీలో మధ్యాహ్నం 12 గంటలకు కీలక మీడియా సమావేశం నిర్వహించనున్నట్లు రాంకా తెలిపారు. ప్రస్తుతం తమ దృష్టి ఎన్నికల సంఘం, ఓటు హక్కుల అంశాలపై ఉంటుందని పేర్కొన్నారు. ప్రధాన ఎన్నికల కమిషనర్‌ జ్ఞానేశ్‌ కుమార్‌ను ఉద్దేశించి ఆయన సోషల్‌ మీడియాలో వ్యాఖ్యలు చేశారు.

ఇటీవల ది ఇండియన్‌ ఎక్స్‌ప్రెస్‌ ప్రచురించిన నివేదిక అనంతరం ఈ పరిణామం చోటుచేసుకుంది. గత పది నెలల్లో ఎన్నికల సంఘం తీసుకున్న కొన్ని నిర్ణయాలపై ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి కనీసం 14 సార్లు రికార్డుల్లో అభ్యంతరాలు వ్యక్తం చేసినట్లు ఆ నివేదిక పేర్కొంది. ఓటరు నమోదు, ఓటర్ల జాబితాలు, ప్రత్యేక సమగ్ర సవరణ ప్రక్రియకు సంబంధించిన అంశాలు ఇందులో ఉన్నట్లు తెలిపింది. అయితే ఎన్నికల సంఘం ఈ నోట్లను సూచనలుగా పేర్కొంటూ, కీలక నిర్ణయాలన్నీ ఏకగ్రీవంగానే తీసుకున్నామని వెల్లడించింది.