భద్రాచలం పరిసర గ్రామాలపై సీఎం రేవంత్ కీలక యోచన

ఏపీలో విలీనమైన భద్రాచలం పరిసర గ్రామాలను తిరిగి తెలంగాణలో కలిపే అంశంపై రాష్ట్ర ప్రభుత్వం దృష్టి సారించినట్లు తెలుస్తోంది. తెలంగాణ జన సమితి నేతలతో జరిగిన చర్చ సందర్భంగా ముఖ్యమంత్రి రేవంత్ రెడ్డి ఈ గ్రామాల అంశాన్ని ప్రస్తావించారు. వాటిని తిరిగి రాష్ట్రంలో కలిపేందుకు అటు కేంద్ర ప్రభుత్వంతో పాటు ఇటు ఆంధ్రప్రదేశ్ ప్రభుత్వంపై కూడా ఒత్తిడి తీసుకొస్తానని ఆయన భరోసా ఇచ్చినట్లు సమాచారం. ఈ అంశంపై రాజకీయ పార్టీలన్నింటినీ ఒకే వేదికపైకి తీసుకొచ్చేందుకు డిప్యూటీ సీఎం నేతృత్వంలో అఖిలపక్ష కమిటీ ఏర్పాటు చేయించే ప్రతిపాదనను కూడా సీఎం పరిశీలిస్తున్నట్లు తెలుస్తోంది.

మరోవైపు, సామాజిక పింఛన్లను రూ.4 వేలకు పెంచే అంశంపై త్వరలోనే నిర్ణయం వెలువడే అవకాశం ఉందనే సంకేతాలు సీఎం వ్యాఖ్యల్లో కనిపించాయి. అలాగే, బుల్లెట్‌ ట్రైన్‌ను సూర్యాపేట మీదుగా నడిపించే అంశం తన పరిధిలో లేదని రేవంత్ రెడ్డి స్పష్టం చేసినట్లు సమాచారం. భద్రాచలం పరిసర గ్రామాల విలీనం, పింఛన్ల పెంపు, బుల్లెట్‌ ట్రైన్‌ మార్గం వంటి అంశాలపై సీఎం చేసిన వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి.