సీఈసీ తొలగింపు వరకు కాంగ్రెస్ పోరాటం ఆగదు: మహేశ్‌కుమార్ గౌడ్

కేంద్ర ఎన్నికల ప్రధాన కమిషనర్ (సీఈసీ) జ్ఞానేశ్‌కుమార్‌ను పదవి నుంచి తొలగించే వరకు కాంగ్రెస్ పార్టీ ఉద్యమాన్ని కొనసాగిస్తుందని టీపీసీసీ అధ్యక్షుడు మహేశ్‌కుమార్‌గౌడ్ తెలిపారు. దిల్లీలోని రాహుల్‌గాంధీ నివాసంలో మంగళవారం సాయంత్రం జరిగిన ఇండియా కూటమి నేతల హై టీ సమావేశంలో తీసుకున్న నిర్ణయాలను ఆయన వెల్లడించారు. ప్రత్యేక ఓటర్ల జాబితా సవరణ (ఎస్‌ఐఆర్‌) ప్రక్రియలో అర్హులైన ఓటర్ల పేర్లు తొలగిస్తున్నారని ఆయన ఆరోపించారు. పశ్చిమ బెంగాల్, బిహార్, మహారాష్ట్ర ఎన్నికల సందర్భంగా కూడా ఇలాంటి పరిణామాలు చోటుచేసుకున్నాయని పేర్కొంటూ, ఈ అంశంపై ఇండియా కూటమి రాష్ట్రాలవారీగా నిరసనలను ఉద్ధృతం చేయాలని నిర్ణయించినట్లు తెలిపారు. హైదరాబాద్‌లో త్వరలో భారీ ర్యాలీ, బహిరంగ సభ నిర్వహించనున్నట్లు వెల్లడించారు.

మరోవైపు, ఓట్ల తొలగింపుపై బీజేపీ రాష్ట్ర అధ్యక్షుడు ఎన్. రామచందర్‌రావుకు విసిరిన సవాల్‌కు కట్టుబడి ఉన్నామని మంత్రి పొన్నం ప్రభాకర్ తెలిపారు. ఎస్‌ఐఆర్‌ ప్రక్రియలో రాష్ట్రంలో తొలగించిన ఓట్లకు సంబంధించిన ఆధారాలను ఆయన ముందుంచుతామని పేర్కొన్నారు. నిరసన కార్యక్రమాల కోసం ఉపయోగించే దిల్లీలోని జంతర్‌మంతర్‌ను డీనోటిఫై చేస్తూ కేంద్ర ప్రభుత్వం తీసుకున్న నిర్ణయాన్ని వెంటనే ఉపసంహరించుకోవాలని ఎంపీ మల్లు రవి డిమాండ్ చేశారు. ఓటర్ల జాబితా సవరణ, ఓట్ల తొలగింపు అంశాలపై కాంగ్రెస్ నేతలు తమ అభ్యంతరాలను వ్యక్తం చేస్తూ ఉద్యమాన్ని కొనసాగిస్తామని స్పష్టం చేశారు.