ట్రేడింగ్ మోసంలో కానిస్టేబుల్‌కు టోకరా.. రూ.29.20 లక్షలు స్వాహా!

సైబర్ నేరాలపై పోలీసులు ఎన్ని అవగాహన కార్యక్రమాలు నిర్వహిస్తున్నా ఆన్‌లైన్ పెట్టుబడులు, ట్రేడింగ్ పేరుతో జరుగుతున్న మోసాలకు సామాన్యులు బలవుతూనే ఉన్నారు. తాజాగా హైదరాబాద్‌లోని గచ్చిబౌలి పోలీస్‌స్టేషన్‌లో విధులు నిర్వహిస్తున్న ఓ కానిస్టేబుల్‌ కూడా ఇలాంటి మోసానికి గురయ్యాడు. ఫేస్‌బుక్‌లో సుకన్యారెడ్డి అనే పేరుతో ఓ మహిళ అతడికి ఫ్రెండ్ రిక్వెస్ట్ పంపింది. దాన్ని అంగీకరించిన తర్వాత ఇద్దరూ తరచూ చాటింగ్ చేసుకున్నారు. అనంతరం వాట్సాప్ నంబర్లు ఇచ్చిపుచ్చుకుని సంభాషణ కొనసాగించారు.

ఈ క్రమంలో డార్విన్ ఎక్స్ గ్లోబల్ అనే ట్రేడింగ్ యాప్ ద్వారా తక్కువ సమయంలోనే అధిక లాభాలు పొందవచ్చని ఆ మహిళ కానిస్టేబుల్‌కు సూచించింది. ఆమె మాటలు నమ్మిన అతడు తొలుత చిన్న మొత్తాల్లో పెట్టుబడి పెట్టాడు. యాప్‌లో లాభాలు వచ్చినట్లు చూపించడంతో పాటు డబ్బు విత్‌డ్రా చేసుకునే అవకాశం కనిపించడంతో పలుదఫాలుగా వివిధ బ్యాంకు ఖాతాలకు మొత్తం రూ.29.20 లక్షలు బదిలీ చేశాడు. కొంతకాలానికి యాప్‌లో రూ.76 లక్షల లాభం వచ్చినట్లు కనిపించింది. అయితే ఆ మొత్తాన్ని విత్‌డ్రా చేసుకునేందుకు ప్రయత్నించగా ట్యాక్స్‌, ఎక్స్ఛేంజ్ ఛార్జీలు, ఫండ్ రిలీజ్ ఫీజుల పేరుతో మరో రూ.12 లక్షలు చెల్లించాలని కోరారు. దీంతో తాను మోసపోయినట్లు గుర్తించిన కానిస్టేబుల్ సైబర్ క్రైమ్ పోలీసులకు ఫిర్యాదు చేశాడు.