నా ప్రతి అడుగులో తోడుగా నిలిచింది జ్యోతికనే.. ఎమోషనల్ అయిన సూర్య

చెన్నైలో జరిగిన ‘సీన్’ సినిమా ట్రైలర్‌ లాంచ్‌ కార్యక్రమంలో నటుడు సూర్య భావోద్వేగానికి గురయ్యారు. ఈ చిత్రంలో సూర్య, నజ్రియా నజీమ్‌ ప్రధాన పాత్రల్లో నటిస్తున్నారు. ‘ఆవేశం’ సినిమాతో గుర్తింపు తెచ్చుకున్న జితు మాధవన్‌ దీనికి దర్శకత్వం వహించారు. జ్యోతిక, సూర్య తమ 2డీ ఎంటర్‌టైన్‌మెంట్‌, అగరం స్టూడియోస్‌ బ్యానర్లపై ఈ చిత్రాన్ని నిర్మించారు. దీపావళి సందర్భంగా నవంబర్ 6న ఈ సినిమా థియేటర్లలో విడుదల కానుంది.

ఈ కార్యక్రమంలో తన భార్య జ్యోతిక గురించి మాట్లాడుతూ సూర్య ప్రశంసలు కురిపించారు. తాను ఈ స్థాయికి చేరుకోవడానికి, జీవితంలో ముందుకు సాగడానికి ప్రతి అడుగులోనూ జ్యోతిక అండగా నిలిచిందని చెప్పారు. తన కెరీర్‌లో ఎన్నో తప్పులు చేసిన సందర్భాలు, కష్టాల్లో కిందపడిన సమయాలు ఉన్నాయని, ప్రతిసారీ తన చేయి పట్టుకుని ముందుకు నడిపించింది జ్యోతికేనని గుర్తుచేసుకున్నారు. ఆమె తనకు ఉత్తమ తల్లి, మంచి స్నేహితురాలు, జీవిత భాగస్వామి మాత్రమే కాకుండా ఎంతో బలమైన మహిళ అని కొనియాడారు. తన జీవిత ప్రయాణంలో ఎప్పుడూ తోడుగా నిలిచినందుకు జ్యోతికకు కృతజ్ఞతలు తెలిపారు. ఈ సినిమాలో నస్లేన్, ఆనంద్ రాజ్, లాల్, రాజ్ ప్రియన్ కీలక పాత్రల్లో నటిస్తున్నారు.