

బంగాళాఖాతంలో ఏర్పడిన అక్వాన్ తుఫాన్ క్రమంగా బలపడుతూ ఆంధ్రప్రదేశ్ తీరం వైపు కదులుతోంది. ప్రస్తుతం ఈ తుఫాన్ నైరుతి, పశ్చిమ మధ్య బంగాళాఖాతంలో కేంద్రీకృతమై ఉందని వాతావరణ శాఖ అధికారులు వెల్లడించారు. గత ఆరు గంటల్లో గంటకు సుమారు 3 కిలోమీటర్ల వేగంతో కదిలినట్లు తెలిపారు. ఇది మరింత బలపడి తీవ్ర తుఫాన్గా మారే అవకాశం ఉందని అంచనా వేస్తున్నారు. ప్రస్తుతం చెన్నైకి 600 కిలోమీటర్లు, మచిలీపట్నానికి 650 కిలోమీటర్లు, విశాఖపట్నానికి 660 కిలోమీటర్లు, ఒడిశాలోని గోపాల్పూర్కు 780 కిలోమీటర్ల దూరంలో ఈ తుఫాన్ కేంద్రీకృతమై ఉంది.
పశ్చిమ వాయవ్య దిశగా కదులుతున్న అక్వాన్ తుఫాన్ రానున్న రోజుల్లో మరింత బలపడే అవకాశం ఉందని వాతావరణ నిపుణులు చెబుతున్నారు. శుక్రవారం మధ్యాహ్నానికి నెల్లూరు నుంచి విశాఖపట్నం మధ్య ఆంధ్రప్రదేశ్ తీరాన్ని దాటే అవకాశాలు ఉన్నాయని అంచనా వేస్తున్నారు. తుఫాన్ ప్రభావంతో తీర ప్రాంతాల్లో భారీ వర్షాలు, బలమైన ఈదురుగాలులు వీచే ప్రమాదం ఉంది. దీంతో అధికారులు అప్రమత్తమయ్యారు. రైతులు కోతకు వచ్చిన పంటలను సురక్షిత ప్రాంతాలకు తరలించుకోవాలని, ముందస్తు జాగ్రత్తలు తీసుకోవాలని సూచించారు. ప్రజలు వాతావరణ శాఖ తాజా హెచ్చరికలను గమనిస్తూ అధికారుల సూచనలు పాటించాలని కోరారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!