

మాజీ ప్రధాని షేక్ హసీనా వచ్చే నెలలో స్వదేశానికి తిరిగి వెళ్లనున్నారనే వార్తల నేపథ్యంలో బంగ్లాదేశ్లో ఉద్రిక్తతలు పెరుగుతున్నాయి. మరోసారి హింస చెలరేగే ప్రమాదం ఉందని నిఘా వర్గాలు హెచ్చరించినట్లు సమాచారం. దీంతో అధికారులు దేశవ్యాప్తంగా భద్రతను కట్టుదిట్టం చేశారు. ఈ పరిస్థితుల్లో ఢాకా అంతర్జాతీయ విమానాశ్రయం సమీపంలోని రెండు వేర్వేరు ప్రాంతాల్లో నాటు బాంబు పేలుళ్లు సంభవించాయి. ఈ ఘటనల్లో ముగ్గురు పాదచారులు గాయపడినట్లు అధికారులు వెల్లడించారు. అయితే, ఈ పేలుళ్లకు హసీనా స్వదేశానికి తిరిగి వచ్చే ప్రణాళికలతో సంబంధం ఉందా అనే విషయం ఇంకా స్పష్టంకాలేదు. 2024 ఆగస్టు నుంచి భారత్లో ఉంటున్న హసీనా, డిసెంబర్లో బంగ్లాదేశ్కు తిరిగి వెళ్లేందుకు ప్రయత్నిస్తున్నట్లు ప్రకటించారు. ఈ ప్రకటన తర్వాత ఆమె మద్దతుదారులు, వ్యతిరేకుల మధ్య ఘర్షణలు చోటుచేసుకుంటున్నట్లు కథనాలు వెలువడ్డాయి. బ్యాంకులపై దాడులు, బస్సులకు నిప్పంటించడం వంటి పలు హింసాత్మక ఘటనలు కూడా నమోదయ్యాయి. గత కొన్ని వారాల్లో దేశవ్యాప్తంగా సుమారు 50 నాటు బాంబు పేలుళ్లు జరిగినట్లు స్థానిక మీడియా పేర్కొంది.
ఈ హింసాత్మక ఘటనలకు అవామీ లీగ్ పార్టీ, దాని అనుబంధ సంస్థలే కారణమని పోలీసులు ఆరోపిస్తున్నారు. తాజా పరిణామాల నేపథ్యంలో విధ్వంసక చర్యలను అడ్డుకునేందుకు ఢాకా పోలీసులు భద్రతా చర్యలను మరింత పెంచారు. అవామీ లీగ్కు కంచుకోటలుగా భావించే ఢాకా, గోపాల్గంజ్తో పాటు ఇతర జిల్లాల్లో అదనపు భద్రతను ఏర్పాటు చేశారు. డిసెంబర్ నెలంతా అదనపు బలగాలను మోహరించాలని అధికారులు నిర్ణయించారు. ఇదిలా ఉండగా, లండన్లోనూ ఘర్షణలు చోటుచేసుకున్నాయి. హసీనా ప్రభుత్వ పతనానికి దారితీసిన 2024 ఉద్యమంలో కీలక పాత్ర పోషించిన విద్యార్థి నాయకుడు, ప్రస్తుతం నేషనల్ సిటిజన్ పార్టీ అధ్యక్షుడిగా ఉన్న నహీద్ ఇస్లాం తూర్పు లండన్లోని రామ్ఫోర్డ్లో బంగ్లాదేశ్ ప్రవాసులు నిర్వహించిన కార్యక్రమానికి హాజరయ్యారు. ఆయన పర్యటనను వ్యతిరేకించిన హసీనా మద్దతుదారులు సమావేశ ప్రాంగణం బయట నిరసన చేపట్టారు. కార్యక్రమానికి వచ్చిన అతిథులపై గుడ్లు, నీళ్ల బాటిళ్లు విసిరినట్లు సమాచారం. దీంతో ఇరువర్గాల మధ్య ఘర్షణ జరిగినట్లు తెలిసింది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!