ఉపాధి హామీ ఉద్యోగులకు దసరా కానుక.. గ్రాట్యుటీ మంజూరు చేసిన తెలంగాణ ప్రభుత్వం

తెలంగాణ ప్రభుత్వం ఉపాధి హామీ పథకంలో పనిచేస్తున్న ఎఫ్‌టీఈ ఉద్యోగులకు దసరా కానుకగా గ్రాట్యుటీని మంజూరు చేసింది. ఈ మేరకు ప్రభుత్వం జీవో జారీ చేసింది. ఈ నిర్ణయంతో సుమారు 3,800 మంది ఉద్యోగులకు ఆర్థిక భరోసా లభించనుంది. ఉద్యోగుల దీర్ఘకాలిక డిమాండ్‌ను పరిష్కరించడంలో మంత్రి సీతక్క చొరవ కీలకంగా నిలిచిందని ఉద్యోగుల సంఘం పేర్కొంది. రిటైర్మెంట్ సమయంలో కనీసం రూ.4 లక్షల గ్రాట్యుటీతో పాటు, పదేళ్ల సర్వీసు పూర్తిచేసిన ఉద్యోగులకు కనీసం రూ.10 లక్షల వరకు ప్రయోజనం లభించనున్నట్లు వెల్లడించింది.

ఉద్యోగుల సంక్షేమమే ప్రజా ప్రభుత్వ లక్ష్యమని మంత్రి సీతక్క పేర్కొన్నారు. ఉద్యోగుల హక్కులు, ఆత్మగౌరవానికి తమ ప్రభుత్వం ప్రాధాన్యం ఇస్తోందని, ఏళ్ల తరబడి పెండింగ్‌లో ఉన్న సమస్యలకు పరిష్కారం చూపుతున్నామని తెలిపారు. పదవీ విరమణ తర్వాత ఉద్యోగులు ఆర్థిక ఇబ్బందులు పడకూడదన్నదే తమ సంకల్పమని, కష్టపడి పనిచేసిన ఉద్యోగులకు జీవిత చరమాంకంలో ఆర్థిక భద్రత కల్పించడం ప్రభుత్వ బాధ్యతని స్పష్టం చేశారు. గ్రాట్యుటీ మంజూరుపై ఉద్యోగుల సంఘం సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రి సీతక్కకు కృతజ్ఞతలు తెలిపింది.