అభిజీత్ దీప్కేకు నానమ్మ మరణవార్త చెప్పలేదన్న ఆరోపణలు.. వీడియో విడుదల చేసిన దిల్లీ పోలీసులు

కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కేకు ఆయన నానమ్మ మరణవార్తను తెలియజేయలేదన్న ఆరోపణలను దిల్లీ పోలీసులు ఖండించారు. ఈ విషయాన్ని ఆయనకు సున్నితంగా తెలియజేయడంతో పాటు, అంత్యక్రియలకు హాజరయ్యేందుకు సొంతూరికి వెళ్లే ప్రయాణ ఏర్పాట్లలో సహాయం చేస్తామని చెప్పినట్లు వెల్లడించారు. ఈ మేరకు ఆదివారం ఓ వీడియోను విడుదల చేశారు. దీప్కే తల్లి చేసిన ఆరోపణలు, సీజేపీ నాయకులు వ్యక్తం చేసిన అభ్యంతరాల నేపథ్యంలో డిప్యూటీ కమిషనర్ ఆఫ్ పోలీస్ నేహా యాదవ్ విలేకరుల సమావేశంలో ఆ వీడియోను మీడియాకు చూపించారు.

సమాచారం అందిన వెంటనే దీప్కేకు నానమ్మ మరణవార్తతో పాటు అంత్యక్రియల సమయాన్ని కూడా తెలియజేశామని నేహా యాదవ్ తెలిపారు. కుటుంబ సభ్యులతో మాట్లాడేందుకు అవకాశం కల్పించామని, సొంతూరికి వెళ్లేందుకు అవసరమైన సహాయం అందిస్తామని చెప్పినా ఆయన దాన్ని స్వీకరించేందుకు నిరాకరించారని వివరించారు. జంతర్ మంతర్ వద్ద నిరసనలో పాల్గొనేందుకు వెళ్తున్న సమయంలో విమానంలోనే దీప్కేను పోలీసులు అదుపులోకి తీసుకున్నారు. అనంతరం మేజిస్ట్రేట్ ముందు హాజరుపరిచిన తర్వాత విడుదల చేశారు.