మైక్రోసాఫ్ట్‌కు గుడ్‌బై చెప్పిన కెవిన్ లాచాపెల్

మైక్రోసాఫ్ట్ గేమింగ్ విభాగం ఎక్స్‌బాక్స్‌లో కొనసాగుతున్న పునర్వ్యవస్థీకరణలో భాగంగా సుమారు 3,200 మంది ఉద్యోగులను తొలగిస్తున్నట్లు సంస్థ ప్రకటించింది. ఈ లేఆఫ్స్ ప్రభావం కేవలం జూనియర్ ఉద్యోగులకే కాకుండా, సంస్థలో 37 ఏళ్ల పాటు సేవలందించిన వైస్ ప్రెసిడెంట్ కెవిన్ లాచాపెల్‌పై కూడా పడింది. లింక్డిన్‌లో తన భావోద్వేగ పోస్టులో ఆయన మైక్రోసాఫ్ట్‌తో తన ప్రయాణం ముగిసిందని పేర్కొంటూ, ఎక్స్‌బాక్స్ బ్యాక్‌వర్డ్ కంపాటబిలిటీ ప్రోగ్రామ్‌ను రూపొందించిన ఇంజినీరింగ్ బృందానికి నాయకత్వం వహించిన అనుభవం తనకు చిరస్మరణీయమని తెలిపారు.

1989లో సాఫ్ట్‌వేర్ ఇంజినీర్‌గా మైక్రోసాఫ్ట్‌లో చేరిన కెవిన్ లాచాపెల్, అనంతరం ఎక్స్‌బాక్స్ విభాగంలో కీలక బాధ్యతలు నిర్వహిస్తూ వైస్ ప్రెసిడెంట్ స్థాయికి ఎదిగారు. తాజా లేఆఫ్స్‌లో ఇప్పటికే సుమారు 1,600 మంది ఉద్యోగులను తొలగించిన ఎక్స్‌బాక్స్, మిగిలిన ఉద్యోగుల తొలగింపును 2026-27 ఆర్థిక సంవత్సరం ముగిసేలోపు పూర్తి చేయనున్నట్లు తెలిపింది. సంస్థ వ్యాపార పరిస్థితులను దృష్టిలో పెట్టుకుని ఈ క్లిష్టమైన నిర్ణయం తీసుకోవాల్సి వచ్చిందని సీఈఓ ఆశా శర్మ ఉద్యోగులకు పంపిన అంతర్గత ఈమెయిల్‌లో వెల్లడించినట్లు సమాచారం.