ఎర్రవల్లి భూ సర్వే నివేదిక సిద్ధం.. కలెక్టర్‌కు అందజేత

సిద్దిపేట జిల్లా ఎర్రవల్లి గ్రామంలోని భూముల సర్వే తుది దశకు చేరుకుంది. మర్కుక్ మండలంలోని సర్వే నంబర్ 325లో ఉన్న 388 ఎకరాల భూములపై రెవెన్యూ, సర్వే ల్యాండ్ రికార్డ్స్ అధికారులు క్షేత్రస్థాయిలో సర్వే పూర్తి చేశారు. సర్వేకు సంబంధించిన సమగ్ర నివేదికను అధికారులు సిద్దిపేట జిల్లా కలెక్టర్ హైమావతికి అందజేశారు.

ఎర్రవల్లిలో అధికారులు పలు రోజుల పాటు భూముల హద్దులు, క్షేత్రస్థాయి పరిస్థితులు, రికార్డుల్లోని వివరాలను పరిశీలించారు. సర్వే నంబర్ 325లోని భూములకు సంబంధించి అనుభవదారులకు నోటీసులు జారీ చేసి, వారి వద్ద ఉన్న పత్రాలను పరిశీలించారు. ప్రస్తుతం నివేదికలో అధికారులు పొందుపరిచిన అంశాలపై ఆసక్తి నెలకొంది. కలెక్టర్ హైమావతి ఈ నివేదికను ప్రభుత్వానికి సమర్పించనున్నారు.