యంగ్ ఇండియా ఇంటిగ్రేటెడ్ స్కూళ్ల పనులు వేగవంతం చేయాలి: సీఎస్

తెలంగాణలో యంగ్ ఇండియా ఇంటిగ్రేటెడ్ స్కూళ్ల నిర్మాణం, విద్యా మౌలిక వసతుల అభివృద్ధి, ఫ్యూచర్ సిటీలో అంతర్జాతీయ స్థాయి ఉన్నత విద్యా సంస్థల ఏర్పాటుపై రాష్ట్ర ప్రభుత్వ ప్రధాన కార్యదర్శి సంజయ్ జాజు సీనియర్ అధికారులతో సమీక్ష నిర్వహించారు. రాష్ట్రంలోని 119 అసెంబ్లీ నియోజకవర్గాల్లో దశలవారీగా ఈ పాఠశాలలను ఏర్పాటు చేయాలని ప్రభుత్వం లక్ష్యంగా పెట్టుకుంది. డిసెంబర్ 2027 నాటికి 67, జూన్ 2028 నాటికి 87 పాఠశాలలను పూర్తి చేసేలా పనులను వేగవంతం చేయాలని సీఎస్ అధికారులను ఆదేశించారు. ఒక్కో పాఠశాలను సుమారు 26 ఎకరాల్లో ఆధునిక సదుపాయాలతో నిర్మించడంతో పాటు క్రీడా మైదానాలు, వసతి గృహాలు, సిబ్బంది క్వార్టర్లు, ఆధునిక వంటశాలలు, డిజిటల్ తరగతి గదులు ఏర్పాటు చేయనున్నారు.

తెలంగాణను అంతర్జాతీయ విద్యా కేంద్రంగా అభివృద్ధి చేసే దిశగా ఫ్యూచర్ సిటీలో ప్రముఖ విదేశీ విశ్వవిద్యాలయాల క్యాంపస్‌ల ఏర్పాటుకు ప్రత్యేక విధానం రూపొందించాలని సంజయ్ జాజు సూచించారు. లండన్ యూనివర్సిటీ, బర్మింగ్‌హామ్ యూనివర్సిటీతో పాటు మరో నాలుగు అంతర్జాతీయ విశ్వవిద్యాలయాలు ఫ్యూచర్ సిటీలో క్యాంపస్‌లు ఏర్పాటు చేసేందుకు ఆసక్తి చూపుతున్నట్లు అధికారులు తెలిపారు. విదేశీ విశ్వవిద్యాలయాలకు అవసరమైన మౌలిక వసతులు, పెట్టుబడులు, అనుమతులు, విద్యా కార్యక్రమాలకు సంబంధించిన అంశాలను విధానంలో చేర్చాలని సీఎస్ ఆదేశించారు. గ్లోబల్ సమ్మిట్ నాటికి స్పష్టమైన కార్యాచరణ ప్రణాళిక సిద్ధం చేయాలని సూచించారు.