తెలంగాణ ప్రజలకు రేవంత్ సర్కార్ గుడ్‌న్యూస్.. కేబినెట్‌లో కీలక నిర్ణయాలు!

తెలంగాణ ముఖ్యమంత్రి రేవంత్ రెడ్డి అధ్యక్షతన జరిగిన రాష్ట్ర మంత్రివర్గ సమావేశంలో పలు కీలక నిర్ణయాలు తీసుకున్నారు. దీపావళి సందర్భంగా రాష్ట్రవ్యాప్తంగా ‘మా ఇందిరమ్మ ఇంట్లో దీపావళి’ కార్యక్రమాన్ని ఘనంగా నిర్వహించాలని నిర్ణయించారు. మంత్రులు, ఎమ్మెల్యేలు తమ నియోజకవర్గాల్లో ఇందిరమ్మ ఇళ్ల లబ్ధిదారులతో కలిసి ఈ వేడుకల్లో పాల్గొంటారు. ఇప్పటికే నిర్మాణం పూర్తయిన 2.25 లక్షల ఇళ్లలో ఈ కార్యక్రమాన్ని నిర్వహించనున్నారు. నవంబర్ 7 నుంచి 9 వరకు కొడంగల్ నియోజకవర్గంలో ముఖ్యమంత్రి అభివృద్ధి కార్యక్రమాల్లో పాల్గొననున్నారు. నవంబర్ 9న భారీ రైతు బహిరంగ సభ నిర్వహించనున్నారు. అలాగే నవంబర్ 19న మాజీ ప్రధాని ఇందిరా గాంధీ జయంతి సందర్భంగా సిద్దిపేటలో బహిరంగ సభ నిర్వహించి, ఇందిరమ్మ చీరల పంపిణీని ప్రారంభించనున్నారు. అదే రోజున ప్రతి కుటుంబానికి రూ.5 లక్షల జీవిత బీమా కల్పించే ఇందిరమ్మ కుటుంబ జీవిత బీమా పథకాన్ని ప్రారంభించాలని నిర్ణయించారు. నవంబర్ 20 నుంచి 30 వరకు గ్రామాల్లో ఇందిరమ్మ కమిటీలు ఇంటింటికీ వెళ్లి దరఖాస్తులు సేకరించనున్నాయి.

మరోవైపు, ప్రస్తుతం ఉన్న ఉమ్మడి ఎస్సీ, ఎస్టీ కమిషన్‌ను రద్దు చేసి, రెండు వర్గాలకు వేర్వేరుగా కమిషన్లు ఏర్పాటు చేయాలని కేబినెట్ నిర్ణయించింది. ఒక్కో కమిషన్‌లో ఒక ఛైర్మన్, ఐదుగురు సభ్యులు ఉంటారు. తెలంగాణ అగ్నిమాపక సేవల చట్టం-1999 సవరణకు సంబంధించిన ఆర్డినెన్స్ జారీకి ఆమోదం తెలిపింది. అగ్ని ప్రమాదాల నివారణ, కారణాల గుర్తింపు, అత్యవసర స్పందనకు సంబంధించిన నిబంధనలను ఇందులో పొందుపరచనున్నారు. అలాగే తెలంగాణ సర్వే, సరిహద్దుల చట్టం-1923లోని సెక్షన్ 12(ఏ)ను సవరించి, అప్పీల్ చేసుకునే గడువును 60 రోజుల నుంచి 30 రోజులకు తగ్గించాలని నిర్ణయించింది. కాటారం, ఎల్కతుర్తి కోర్టులతో పాటు సిద్దిపేట, చౌటుప్పల్, మహబూబాబాద్, వేములవాడ కోర్టుల్లో వివిధ విభాగాలకు మొత్తం 136 పోస్టుల మంజూరుకు మంత్రివర్గం ఆమోదం తెలిపింది.