కృత్రిమ కొరత సృష్టిస్తే ఊరుకోం - రైస్ మిల్లర్లకు ప్రభుత్వం వార్నింగ్

రాష్ట్రంలో బియ్యం ధరలు భారీగా పెరగకుండా, సామాన్యులకు అందుబాటు ధరల్లో బియ్యం లభించేలా తెలంగాణ ప్రభుత్వం చర్యలు చేపట్టింది. పౌర సరఫరాల శాఖ కమిషనర్ ఎం. స్టీఫెన్ రవీంద్ర (ఐపీఎస్) ఆదేశాల మేరకు హైదరాబాద్‌లోని సివిల్ సప్లై భవన్‌లో ఉన్నతస్థాయి సమావేశం నిర్వహించారు. పౌర సరఫరాల శాఖ డైరెక్టర్ జి.వి. శ్యామ్ ప్రసాద్ లాల్ అధ్యక్షతన జరిగిన ఈ సమావేశంలో మిర్యాలగూడ, నిజామాబాద్, నల్గొండ ప్రాంతాలకు చెందిన ప్రముఖ రైస్ మిల్లర్లు, హోల్‌సేల్ వ్యాపారులు పాల్గొన్నారు. మార్కెట్లో బియ్యం కొరత ఏర్పడకుండా చూడాలని, వినియోగదారులకు అందే ధరలను అదుపులో ఉంచాలని అధికారులు స్పష్టం చేశారు.

ప్రస్తుతం మార్కెట్లో అందుబాటులో ఉన్న బియ్యం నిల్వలు గత సీజన్‌కు చెందినవేనని పేర్కొన్న అధికారులు, ధరలను అనవసరంగా పెంచవద్దని హెచ్చరించారు. కృత్రిమ కొరత సృష్టించడం, అక్రమంగా గోదాముల్లో బియ్యాన్ని నిల్వ చేయడం వంటి చర్యలకు పాల్పడితే కఠినమైన చట్టపరమైన చర్యలు తీసుకుంటామని స్పష్టం చేశారు. వ్యాపారుల లాభాపేక్ష కారణంగా సామాన్య ప్రజలు ఇబ్బందులు పడకూడదని తెలిపారు. ధరల నియంత్రణలో ప్రభుత్వానికి సహకరించాలని మిల్లర్లను కోరారు. అవసరాన్ని బట్టి ప్రభుత్వం ప్రత్యేక బియ్యం విక్రయ కేంద్రాలను ఏర్పాటు చేసే అవకాశం ఉందని, వాటికి నిరంతరాయంగా బియ్యం సరఫరా చేయాలని సూచించారు. మార్కెట్ పరిస్థితులను ఎప్పటికప్పుడు పర్యవేక్షిస్తూ, ప్రజలకు అందుబాటు ధరల్లో బియ్యం లభించేలా చర్యలు కొనసాగిస్తామని అధికారులు తెలిపారు.