తాగునీరు వృథా చేస్తే చర్యలు తప్పవు - జలమండలి హెచ్చరిక!

హైదరాబాద్‌ పరిసర ప్రాంతాల్లో తాగునీటి వృథా, దుర్వినియోగ ఘటనలను గుర్తిస్తే వెంటనే సమాచారం అందించాలని హైదరాబాద్‌ జలమండలి ప్రజలకు విజ్ఞప్తి చేసింది. ఎక్కడైనా తాగునీటిని వృథా చేస్తున్నా, దుర్వినియోగం చేస్తున్నా సంబంధిత ఫొటోలు లేదా వీడియోలతో పాటు, ఘటనకు సంబంధించిన వ్యక్తులు లేదా సంస్థల వివరాలు, ఘటన జరిగిన ప్రాంతం, పూర్తి చిరునామాను జలమండలి వాట్సాప్ నంబర్ 99499 30003కు పంపించాలని సూచించింది. ఈ వివరాల ఆధారంగా అధికారులు ఘటనను పరిశీలించేందుకు వీలుంటుందని తెలిపింది.

ప్రజలు తమ ఫిర్యాదులను జలమండలి కస్టమర్ కేర్ నంబర్ 155313 ద్వారా కూడా నమోదు చేయవచ్చని అధికారులు వెల్లడించారు. ప్రజల నుంచి అందే ప్రతి ఫిర్యాదును పరిశీలించి, అవసరమైన చర్యలు తీసుకుంటామని స్పష్టం చేశారు. విలువైన తాగునీరు వృథా కాకుండా చూడటంతో పాటు, నీటిని బాధ్యతాయుతంగా వినియోగించేలా ప్రజల్లో అవగాహన పెంచడం ఈ చర్యల లక్ష్యమని తెలిపారు. తాగునీటి వృథాను అరికట్టేందుకు ప్రజలు అధికారులకు సహకరించాలని జలమండలి కోరింది.