అనకాపల్లి జిల్లాలో ఉద్ధృతంగా ప్రవహిస్తున్న వాగులు

అనకాపల్లి జిల్లాలో పలు వాగులు, నదులు ఉద్ధృతంగా ప్రవహిస్తుండటంతో రహదారి రాకపోకలకు తీవ్ర అంతరాయం ఏర్పడింది. జిల్లాలోని పలు ప్రాంతాల్లో కాజ్‌వేలు, వంతెనలు కొట్టుకుపోయినట్లు సమాచారం. మాడుగుల నియోజకవర్గంలో తాచేరు వాగు పొంగిపొర్లుతోంది. పాత బ్రిడ్జి మీదుగా వరద నీరు ప్రవహిస్తుండటంతో ఆ మార్గంలో ప్రయాణం ప్రమాదకరంగా మారింది. దీంతో అల్లూరి ఏజెన్సీ ప్రాంతాలతో పాటు నర్సీపట్నం వైపు రాకపోకలు నిలిచిపోయాయి.

ప్రభావిత మార్గాల్లో వాహనాలను సాధ్యమైన చోట ప్రత్యామ్నాయ రహదారుల ద్వారా మళ్లిస్తున్నారు. ప్రమాదాలు జరగకుండా కాజ్‌వేలు, వరద నీరు ప్రవహిస్తున్న ప్రాంతాల వద్ద పోలీసులు బందోబస్తు ఏర్పాటు చేశారు. వరద ఉద్ధృతిని పట్టించుకోకుండా వాగులు దాటేందుకు ప్రయత్నించవద్దని సూచిస్తున్నారు. పాడేరు, నర్సీపట్నం వైపు వెళ్లే ప్రయాణికులు రాకపోకల అంతరాయం కారణంగా తీవ్ర ఇబ్బందులు ఎదుర్కొంటున్నారు. పరిస్థితిని దృష్టిలో ఉంచుకుని ప్రభావిత ప్రాంతాల్లో పోలీసులు అప్రమత్తంగా వ్యవహరిస్తున్నారు.