ఏపీ జీఎస్టీ ఆదాయం భారీగా పెరుగుదల !

ఏప్రిల్ నెలలో జీఎస్టీ సెటిల్‌మెంట్ తర్వాత ఆంధ్రప్రదేశ్‌కు రూ.3,797 కోట్ల ఆదాయం వచ్చింది. గత ఏడాదితో పోలిస్తే 38 శాతం వృద్ధి నమోదైంది. సెటిల్‌మెంట్‌కు ముందు రాష్ట్ర ఆదాయం రూ.1,602 కోట్లుగా ఉండగా, తర్వాత ఇది రూ.2,195 కోట్లకు పెరిగింది. దేశవ్యాప్తంగా కూడా జీఎస్టీ వసూళ్లు పెరిగినా, తెలుగు రాష్ట్రాల్లో వృద్ధి సగటు కంటే తక్కువగా నమోదైనట్లు అధికార గణాంకాలు తెలిపాయి.

దేశవ్యాప్తంగా ఏప్రిల్‌లో స్థూల జీఎస్టీ వసూళ్లు రూ.2,42,702 కోట్లుగా నమోదయ్యాయి. రిఫండ్లు తగ్గించిన తర్వాత నికర వసూళ్లు రూ.2,10,909 కోట్లుగా ఉన్నాయి. ఇది గత ఏడాదితో పోలిస్తే 7.3 శాతం వృద్ధి. మొత్తం వసూళ్లలో దేశ ఆర్థిక స్థితి బలంగా ఉన్న సంకేతాలు కనిపిస్తున్నాయని ఆర్థిక నిపుణులు పేర్కొంటున్నారు.