గణేశ్ నిమజ్జనం అనంతరం జీహెచ్ఎంసీ మెగా క్లీనప్..

హైదరాబాద్‌లో వినాయక నిమజ్జనం తుది దశకు చేరుకోవడంతో గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) నగరవ్యాప్తంగా పారిశుద్ధ్య పనులను ముమ్మరం చేసింది. నిమజ్జన ఊరేగింపులు సాగిన మార్గాలతో పాటు హుస్సేన్ సాగర్ పరిసరాల్లో పేరుకుపోయిన చెత్తను సిబ్బంది వేగంగా తొలగిస్తున్నారు. పూలమాలలు, పూజా సామగ్రి, అలంకరణ వస్తువులు, పేపర్ వ్యర్థాలు తదితరాలను తొలగించేందుకు ప్రత్యేక బృందాలు పనిచేస్తున్నాయి. రెండు రోజుల్లో సుమారు 6 వేల మెట్రిక్ టన్నుల చెత్తను సేకరించినట్లు జీహెచ్ఎంసీ అధికారులు తెలిపారు.

మూడు కార్పొరేషన్ల పరిధిలో మొత్తం 13 వేల మెట్రిక్ టన్నుల చెత్తను సేకరించి జవహర్‌నగర్ డంపింగ్ యార్డుకు తరలిస్తున్నారు. పేపర్ షాట్స్‌ ద్వారా వచ్చిన వ్యర్థాలను తొలగించడంలో సిబ్బంది ఇబ్బందులు ఎదుర్కొంటున్నారు. పారిశుద్ధ్య పనుల కోసం జీహెచ్ఎంసీ సుమారు 15 వేల మంది సిబ్బందిని వినియోగిస్తోంది. మరోవైపు, గ్రేటర్ హైదరాబాద్ పరిధిలో ఇప్పటివరకు 3.10 లక్షల గణేశ్ విగ్రహాలు నిమజ్జనం కాగా, అందులో 66 వేల విగ్రహాలు హుస్సేన్ సాగర్‌లోనే నిమజ్జనం చేసినట్లు అధికారులు తెలిపారు. గతేడాదితో పోలిస్తే ఈ ఏడాది నిమజ్జనాల సంఖ్య సుమారు 10 శాతం పెరిగినట్లు పేర్కొన్నారు.