ఐఐటీ బాంబే శాస్త్రవేత్తల కొత్త ఆవిష్కరణ

రక్తంలో చెడు కొలెస్ట్రాల్‌ను తగ్గించేందుకు శాస్త్రవేత్తలు ఇప్పటివరకు ఎంజైమ్‌లు, జన్యువులు, గ్రాహకాలపై దృష్టి పెట్టగా, ఇండియన్ ఇన్‌స్టిట్యూట్ ఆఫ్ టెక్నాలజీ బాంబే పరిశోధకులు కొత్త దారిని ఎంచుకున్నారు. కేటీడీపీ అనే చిన్న పెప్టైడ్‌ను అభివృద్ధి చేసి, రక్తంలోకి కొలెస్ట్రాల్ చేరే ప్రక్రియను మూలంలోనే అడ్డుకోవడం దీని ప్రత్యేకత. కాలేయ కణాల్లోకి కొవ్వు చేరకుండా నిరోధించడం ద్వారా ఇది పనిచేస్తుంది. ప్రయోగశాలలో పెంచిన కాలేయ కణాలు మరియు జీబ్రా చేపలపై చేసిన పరీక్షల్లో, రక్తంలోకి కొలెస్ట్రాల్ మరియు ట్రైగ్లిజరైడ్ల విడుదల సుమారు 50 శాతం వరకు తగ్గినట్లు గమనించారు. ప్రస్తుతం ఈ పెప్టైడ్ ప్రారంభ దశలో ఉండి, ఇంకా మనుషులపై పరీక్షలు జరగాల్సి ఉంది.

మరోవైపు, కొవ్వు జీవక్రియలో కాలేయం కీలక పాత్ర పోషిస్తుంది. కాలేయంలోని భాగాలు కొవ్వును తాత్కాలికంగా నిల్వచేసి, అవసరమైనప్పుడు కణాలకు పంపిస్తాయి. అక్కడి నుంచి అవి ప్రొటీన్ రేణువులుగా మారి రక్తంలో కలుస్తాయి. ఈ ప్రక్రియను చిన్న పెప్టైడ్ ద్వారా నియంత్రించడం కొత్త విధానంగా భావిస్తున్నారు. గుండె సంబంధిత వ్యాధులకు ప్రధాన కారణమైన చెడు కొలెస్ట్రాల్, ట్రైగ్లిజరైడ్లను తగ్గించడంలో ఈ పరిశోధన భవిష్యత్తులో కొత్త చికిత్సగా మారే అవకాశముందని శాస్త్రవేత్తలు భావిస్తున్నారు.