

హైదరాబాద్ నగరంలోని పలు ప్రాంతాల్లో బాంబు పేలుళ్లు జరగనున్నాయంటూ పోలీసులకు బెదిరింపు మెయిల్ రావడం కలకలం రేపింది. 2008 నవంబర్ 26న ముంబైలో జరిగిన ఉగ్రదాడుల తరహాలో దాడులు చేస్తామని మెయిల్లో హెచ్చరించినట్లు సమాచారం. కాచిగూడ రైల్వేస్టేషన్తో పాటు హోటల్ టూరిస్ట్ ప్లాజాను లక్ష్యంగా చేసుకుంటామని పేర్కొన్నారు. జమ్మూకశ్మీర్లో లష్కరే తయిబా టాప్ కమాండర్, మోస్ట్ వాంటెడ్ ఉగ్రవాది లతీఫ్ భట్ హత్యకు ప్రతీకారంగా ఈ దాడులకు పాల్పడతామని బెదిరించినట్లు తెలుస్తోంది. ఈ పరిణామంతో స్పెషల్ బ్రాంచ్ పోలీసులు హైదరాబాద్ నగర పోలీసులను అప్రమత్తం చేశారు. లష్కరే తయిబా పేరుతో వచ్చిన ఈ మెయిల్ ఎక్కడి నుంచి పంపించారనే కోణంలో దర్యాప్తు ప్రారంభించారు.
బెదిరింపు నేపథ్యంలో నగరంలోని హోటళ్లు, రైల్వేస్టేషన్లు, బస్టాండ్లు, రద్దీ ప్రాంతాల్లో భద్రతను కట్టుదిట్టం చేయాలని అధికారులు ఆదేశించారు. అనుమానాస్పద వ్యక్తులు, వాహనాలు, గుర్తుతెలియని వస్తువులపై ప్రత్యేక నిఘా ఉంచాలని పోలీసులకు సూచించారు. అన్ని భద్రతా విభాగాలు పరస్పర సమన్వయంతో పనిచేస్తూ అప్రమత్తంగా ఉండాలని ఉన్నతాధికారులు ఆదేశించారు. బెదిరింపు మెయిల్ నిజమైనదేనా? దాని వెనుక ఎవరున్నారు? అనే అంశాలపై పోలీసులు దర్యాప్తు కొనసాగిస్తున్నారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!