భారత్‌-చైనా సరిహద్దులో సైనిక సామర్థ్యాన్ని పెంచుకున్నాం: జైశంకర్‌

భారత్‌-చైనా సరిహద్దులో వాస్తవాధీన రేఖ (LAC) వెంబడి కార్యకలాపాలు పెరగడంతో పెద్ద సంఖ్యలో సైనికులను మోహరించాల్సిన అవసరం ఏర్పడిందని విదేశాంగ మంత్రి ఎస్‌. జైశంకర్‌ తెలిపారు. 2020లో గల్వాన్‌ లోయలో జరిగిన ఘర్షణ అనంతరం సరిహద్దుల్లో భారత సైనిక సామర్థ్యాలను మరింత బలోపేతం చేసినట్లు చెప్పారు. ఎల్‌ఏసీ వెంబడి నెలకొన్న ప్రతిష్టంభనను తొలగించేందుకు భారత్‌, చైనా ప్రయత్నాలు కొనసాగిస్తున్నాయని దిల్లీలో జరిగిన ఓ కార్యక్రమంలో వెల్లడించారు. అత్యవసర పరిస్థితుల్లో సైనిక బలగాలను వేగంగా మోహరించేందుకు అవసరమైన ఏర్పాట్లు చేసినట్లు పేర్కొన్నారు.

సరిహద్దుల్లో మౌలిక సదుపాయాల అభివృద్ధికి కేంద్ర ప్రభుత్వం ప్రాధాన్యం ఇస్తోందని జైశంకర్‌ తెలిపారు. ఆధునిక సాంకేతికతతో వంతెనలు, సొరంగ మార్గాలు, విమానాశ్రయాలను నిర్మించినట్లు వివరించారు. 2014కు ముందు సరిహద్దు మౌలిక సదుపాయాల అభివృద్ధి నిర్లక్ష్యానికి గురైందని విమర్శించారు. ఎన్డీయే ప్రభుత్వం అధికారంలోకి వచ్చిన తర్వాత రక్షణ రంగ మౌలిక సదుపాయాల నిర్మాణంలో వేగం పెరిగిందన్నారు. సరిహద్దు ప్రాంతాల్లో రహదారులు, సొరంగాల నిర్మాణం ద్వారా సైనికుల రాకపోకలు, అత్యవసర సమయాల్లో బలగాల తరలింపు మరింత సులభమయ్యాయని పేర్కొన్నారు.