నవీ ముంబై విమానాశ్రయం నుంచి అంతర్జాతీయ విమాన సర్వీసులు

ముంబై మెట్రోపాలిటన్ రీజియన్‌లో విమాన రాకపోకలను రెండు విమానాశ్రయాల మధ్య పునర్విభజించే ప్రణాళికలో భాగంగా, ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయం (CSMIA) నుంచి కొన్ని విమాన సర్వీసులను నవీ ముంబై అంతర్జాతీయ విమానాశ్రయం (NMIA)కు తరలించేందుకు అదానీ ఎయిర్‌పోర్ట్స్ ప్రణాళికలు సిద్ధం చేసింది. ఈ మేరకు ఇండిగో, ఎయిర్ ఇండియా గ్రూప్ నుంచి ప్రణాళికలు ఖరారయ్యాయి. ముంబై విమానాశ్రయంలోని టెర్మినల్‌-1 పునరాభివృద్ధికి వీలు కల్పించడంతో పాటు, రెండు విమానాశ్రయాల మధ్య ప్రయాణికుల రద్దీని సమతుల్యం చేయడం ఈ చర్య ప్రధాన ఉద్దేశం.

ఇండిగో 2027 ఫిబ్రవరిలో నవీ ముంబై విమానాశ్రయం నుంచి అంతర్జాతీయ విమాన సర్వీసులను ప్రారంభించనుంది. ముంబై విమానాశ్రయం నుంచి రోజువారీగా నడిచే 12 అంతర్జాతీయ బయలుదేరే సర్వీసులను దశలవారీగా ఇక్కడికి తరలించడంతో పాటు, ఖాట్మండుకు కొత్త సర్వీసును ప్రారంభించాలని యోచిస్తోంది. మరోవైపు, ఎయిర్ ఇండియా ఎక్స్‌ప్రెస్ 2026 డిసెంబర్‌లో నవీ ముంబై నుంచి రోజుకు నాలుగు దేశీయ విమాన సర్వీసులను ప్రారంభించనుంది. 2027 జనవరి నుంచి ఒమన్, కువైట్‌లకు సర్వీసులు నడపాలని ప్రణాళిక రూపొందించింది. అయితే, కువైట్ సర్వీసుకు అవసరమైన అనుమతులు లభించాల్సి ఉంది.