టీజర్‌ తొలగింపుపై సుప్రీంకోర్టులో నిర్మాత పిటిషన్‌...

‘కాలా హిరణ్‌: ది బ్యాటిల్‌ ఫర్‌ లెగసీ’ సినిమా టీజర్‌, ప్రచార చిత్రాలు, సంబంధిత ఇంటర్వ్యూ లింక్‌లను తొలగించాలంటూ దిల్లీ హైకోర్టు ఇచ్చిన ఆదేశాలను సవాల్‌ చేస్తూ చిత్ర నిర్మాత అమిత్‌ జానీ సుప్రీంకోర్టును ఆశ్రయించారు. బాలీవుడ్‌ నటుడు సల్మాన్‌ ఖాన్‌ తన వ్యక్తిత్వ హక్కులు ఉల్లంఘించారని ఆరోపిస్తూ దాఖలు చేసిన పిటిషన్‌పై విచారణ జరిపిన దిల్లీ హైకోర్టు.. సినిమా టీజర్‌తో పాటు సంబంధిత ప్రచార కంటెంట్‌ను తొలగించాలని ఆదేశించింది.

1998లో సల్మాన్‌ ఖాన్‌ ఎదుర్కొన్న కృష్ణజింకల వేట కేసు నేపథ్యంలోనే ఈ చిత్రం తెరకెక్కుతున్నట్లు ప్రచారం జరుగుతోంది. టీజర్‌లో కనిపించే పాత్ర సల్మాన్‌ ధరించే నీలిరంగు బ్రాస్‌లెట్‌ను పోలినదాన్ని ధరించడంపై ఆయన అభ్యంతరం వ్యక్తం చేశారు. ఇది తన వ్యక్తిత్వ హక్కులకు భంగం కలిగిస్తోందని సల్మాన్‌ పేర్కొన్నారు. అయితే హైకోర్టు ఆదేశాలు భావప్రకటనా స్వేచ్ఛను పరిమితం చేస్తున్నాయని నిర్మాత అమిత్‌ జానీ సుప్రీంకోర్టులో వాదించారు. సినిమాను నిలిపివేయాలని కొందరు బెదిరిస్తున్నారని కూడా ఆయన ఆరోపించారు.