నీట్ నిరసనల్లో పుట్టిన ప్రేమ.. జంతర్ మంతర్ నుంచి పెళ్లి వరకు సాగిన రియల్ లవ్ స్టోరీ

ఢిల్లీలోని జంతర్ మంతర్ వద్ద జరిగిన నీట్ నిరసనల మధ్య ఎవరూ ఊహించని ఓ రియల్ లైఫ్ ప్రేమకథ వెలుగులోకి వచ్చింది. నీట్ పేపర్ లీక్ వ్యవహారంపై నిరసనల్లో పాల్గొన్న బీహార్‌కు చెందిన మోహన్ శ్రీవాస్తవ, అదే సమయంలో నీట్ పరీక్ష రాసిన ఢిల్లీకి చెందిన ఓ యువతితో పరిచయం అయ్యాడు. ఉద్యమాలు, ఉద్రిక్త పరిస్థితుల మధ్య ప్రారంభమైన ఈ పరిచయం ఇప్పుడు సోషల్ మీడియాలో విస్తృతంగా చర్చనీయాంశంగా మారింది.

మోహన్ తెలిపిన వివరాల ప్రకారం, ఆ యువతి ప్రతిరోజూ అతనికి ఆహారం తీసుకువచ్చేది. ఒకరోజు సరదాగా "తినడానికి మాత్రమే ఇస్తావా... తాగడానికి నీళ్లు ఇవ్వవా?" అని అడగగా, మరుసటి రోజు ఆమె పెద్ద వాటర్ బాటిల్ తీసుకొచ్చింది. ఆ చిన్న సంఘటనతో ప్రారంభమైన సంభాషణలు క్రమంగా స్నేహంగా, అనంతరం ప్రేమగా మారాయి. చివరకు ఇద్దరూ వివాహ బంధంతో ఒక్కటై, నిరసనల మధ్య మొదలైన వారి ప్రేమకథను నిజ జీవితంలోని అరుదైన సంఘటనగా నిలిపారు.