ఐఎస్ఎం 2.0లో తెలంగాణకు చోటివ్వండి.. కేంద్రానికి మంత్రి శ్రీధర్ బాబు విజ్ఞప్తి

తెలంగాణను ఇండియా సెమీకండక్టర్ మిషన్ (ఐఎస్ఎం) 2.0లో భాగస్వామ్యం చేయాలని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు కేంద్ర ప్రభుత్వాన్ని కోరారు. దీనివల్ల సెమీకండక్టర్ ఫ్యాబ్రికేషన్, చిప్ డిజైన్ రంగాల్లో తెలంగాణ అగ్రగామిగా ఎదిగేందుకు మరిన్ని అవకాశాలు లభిస్తాయని అన్నారు. గురువారం ఢిల్లీలో నిర్వహించిన ఇన్వెస్ట్ తెలంగాణ గ్లోబల్ సమ్మిట్–2026 కర్టెన్ రైజర్ కార్యక్రమంలో ఆయన మాట్లాడారు. రాష్ట్ర రక్షణ రంగ ఎగుమతులు గతంతో పోలిస్తే 103 శాతం పెరిగాయని తెలిపారు. అలాగే, 2030 నాటికి రాష్ట్రంలోని డేటా సెంటర్ల సామర్థ్యాన్ని ఐదు గిగావాట్లకు పెంచేందుకు ప్రణాళికాబద్ధంగా కృషి చేస్తున్నామని వివరించారు.

2047 నాటికి దేశ జీడీపీలో తెలంగాణ వాటాను 10 శాతానికి చేర్చాలనే లక్ష్యంతో గతేడాది తెలంగాణ రైజింగ్ విజన్‌ను ప్రారంభించినట్లు శ్రీధర్ బాబు తెలిపారు. ప్రపంచ స్థాయి మౌలిక సదుపాయాలు, నైపుణ్యం కలిగిన మానవ వనరులు, వ్యాపార నిర్వహణ సౌలభ్యాన్ని పెంచే విధానాలు రాష్ట్ర పారిశ్రామికాభివృద్ధికి దోహదపడుతున్నాయని పేర్కొన్నారు. తెలంగాణలోని పెట్టుబడి అవకాశాలను పారిశ్రామికవేత్తలకు వివరించి, రాష్ట్ర అభివృద్ధి లక్ష్యాల్లో వారిని భాగస్వాములను చేయడమే ఢిల్లీలో నిర్వహించిన కర్టెన్ రైజర్ కార్యక్రమం ఉద్దేశమని చెప్పారు. రాష్ట్ర ప్రభుత్వం ప్రతిష్ఠాత్మకంగా నిర్వహించనున్న గ్లోబల్ సమ్మిట్ 2.0లో పాల్గొనాలని పారిశ్రామికవేత్తలకు మంత్రి ఆహ్వానం పలికారు.