శంషాబాద్ ఎయిర్‌పోర్ట్‌లో విదేశీ కరెన్సీ పట్టివేత

హైదరాబాద్‌లోని శంషాబాద్ అంతర్జాతీయ విమానాశ్రయంలో భారీగా విదేశీ కరెన్సీ పట్టుబడింది. కౌలాలంపూర్‌కు వెళ్లేందుకు సిద్ధమైన ఇద్దరు ప్రయాణికుల నుంచి సుమారు రూ.1.56 కోట్ల విలువైన విదేశీ కరెన్సీని డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్‌ఐ) అధికారులు స్వాధీనం చేసుకున్నారు. ఈ ఘటనలో ఇద్దరు ప్రయాణికులను అరెస్ట్ చేసినట్లు సమాచారం.

అధికారులు తెలిపిన వివరాల ప్రకారం.. ఓ ప్రయాణికుడి వద్ద రూ.63.62 లక్షల విలువైన విదేశీ కరెన్సీని గుర్తించారు. మరో ప్రయాణికురాలి వద్ద రూ.91.94 లక్షల విలువైన కరెన్సీని స్వాధీనం చేసుకున్నారు. మొత్తం స్వాధీనం చేసుకున్న విదేశీ కరెన్సీ విలువ రూ.1,55,56,000గా ఉంది. ఈ కరెన్సీని తరలించేందుకు అవసరమైన అనుమతులు ఉన్నాయా అనే అంశంపై అధికారులు దర్యాప్తు చేస్తున్నట్లు సమాచారం.