అరేబియా సముద్రంలో భారీ డ్రగ్స్ వేట..

అంతర్జాతీయ డ్రగ్స్ స్మగ్లింగ్ ముఠా సముద్ర మార్గం ద్వారా భారత్‌లోకి మత్తు పదార్థాలను తరలించే ప్రయత్నాన్ని భారత రక్షణ దళాలు భగ్నం చేశాయి. భారత తీర రక్షక దళం, గుజరాత్ ఉగ్రవాద నిరోధక దళం సంయుక్తంగా అరేబియా సముద్రంలో నిర్వహించిన ఆపరేషన్‌లో రూ.3,000 కోట్లకు పైగా విలువైన మత్తు పదార్థాలను స్వాధీనం చేసుకున్నారు. సెప్టెంబర్ 25న అంతర్జాతీయ జలాల సరిహద్దుల్లో అనుమానాస్పదంగా సంచరిస్తున్న ఇరాన్ దేశానికి చెందిన బోటును అధికారులు అడ్డుకుని తనిఖీ చేయగా, 526 కిలోల హెరాయిన్, మెథాంఫెటమైన్ లభించాయి. బోటులో ఉన్న ఐదుగురు పాకిస్థాన్ పౌరులను అరెస్ట్ చేశారు.

సముద్ర మార్గం ద్వారా భారీగా మత్తు పదార్థాల అక్రమ రవాణా జరుగుతోందన్న నిఘా సమాచారంతో ఈ ఆపరేషన్ చేపట్టినట్లు అధికారులు తెలిపారు. స్వాధీనం చేసుకున్న మత్తు పదార్థాలు, అరెస్ట్ చేసిన నిందితులను కట్టుదిట్టమైన భద్రత మధ్య ముంబైకి తరలించారు. మత్తు పదార్థాలను ఎక్కడి నుంచి తరలించారు, భారత్‌లో ఏ ప్రాంతానికి చేరవేయాల్సి ఉంది, ఈ స్మగ్లింగ్ వెనుక ఉన్న ప్రధాన సూత్రధారులు ఎవరు అనే అంశాలపై గుజరాత్ ఉగ్రవాద నిరోధక దళం, తీర రక్షక దళం, మాదకద్రవ్యాల నియంత్రణ సంస్థ, ఇతర కేంద్ర దర్యాప్తు సంస్థలు సంయుక్తంగా విచారణ కొనసాగిస్తున్నాయి.