తెలంగాణ గ్లోబల్ సమ్మిట్‌లో భారీ రక్షా ఎక్స్‌పో

తెలంగాణ గ్లోబల్ సమ్మిట్–2026లో భాగంగా డిసెంబర్ 7, 8, 9 తేదీల్లో హైదరాబాద్‌లో భారీ స్థాయిలో రక్షా ఎక్స్‌పో నిర్వహించనున్నట్లు రాష్ట్ర ప్రభుత్వ ప్రధాన కార్యదర్శి సంజయ్ జాజు తెలిపారు. డిసెంబర్ 9న ప్రత్యేకంగా ఎయిర్ షో కూడా నిర్వహించనున్నట్లు వెల్లడించారు. ఎక్స్‌పో ఏర్పాట్లపై సచివాలయంలో సమీక్ష నిర్వహించిన సీఎస్.. పాల్గొనే సంస్థలు, ప్రచారం, భద్రతా ఏర్పాట్లు తదితర అంశాలపై అధికారులతో చర్చించారు. హైదరాబాద్ కేంద్రంగా దేశంలోని రక్షణ, ఏరోస్పేస్ రంగాలకు చెందిన సుమారు 30 శాతం పరిశ్రమలు పనిచేస్తున్నాయని తెలిపారు.

జాతీయ, అంతర్జాతీయ స్థాయిలోని ప్రముఖ డిఫెన్స్, ఏరోస్పేస్ సంస్థలను ఎక్స్‌పోకు ఆహ్వానిస్తున్నట్లు సంజయ్ జాజు చెప్పారు. అక్టోబర్ 24న హైదరాబాద్‌లో, అక్టోబర్ 29న న్యూఢిల్లీలో రోడ్ షోలు నిర్వహించి విస్తృత ప్రచారం కల్పించనున్నట్లు తెలిపారు. హెచ్‌ఏఎల్, బీఈఎల్, బీడీఎల్ తదితర సంస్థలు ఉత్పత్తుల ప్రదర్శనతో పాటు బయ్యర్–సెల్లర్ సమావేశాలు, బిజినెస్ ఇంటరాక్షన్స్, ఎంఓయూలు, స్టార్టప్ అవకాశాలు, సెమినార్లు నిర్వహించనున్నాయి. రక్షణ, ఏరోస్పేస్ రంగాల్లో పెట్టుబడులను ఆకర్షించేందుకు ఈ ఎక్స్‌పో కీలక వేదికగా నిలుస్తుందని సీఎస్ పేర్కొన్నారు.