రెండో సీజన్‌కు ముస్తాబవుతున్న ఊటీ

ప్రపంచ ప్రఖ్యాత పర్యాటక ప్రాంతమైన ఊటీ రెండో సీజన్‌కు సిద్ధమవుతోంది. నీలగిరి జిల్లాలోని ఊటీ బొటానికల్‌ గార్డెన్‌లో రెండో సీజన్‌ కోసం పూలకుండీల్లో పెంచుతున్న మొక్కలు ప్రస్తుతం అందంగా వికసిస్తున్నాయి. మేరిగోల్డ్‌, డాలియా, డైసీ, కేలండులా తదితర రకాల పుష్పాలు పర్యాటకులను ఆకట్టుకుంటున్నాయి. ప్రతి ఏడాది ఏప్రిల్‌, మే నెలల్లో సమ్మర్‌ సీజన్‌ సందర్భంగా ఊటీలో ఫ్లవర్‌ షోలు, రోజ్‌ ఎగ్జిబిషన్‌, కున్నూరు సిమ్స్‌ పార్కులో ఫల, పుష్ప ప్రదర్శనలు నిర్వహిస్తారు. ఇదే విధంగా సెప్టెంబరు, అక్టోబరు నెలల్లో రెండో సీజన్‌ సందర్భంగా దేశంలోని వివిధ ప్రాంతాలతో పాటు విదేశాల నుంచి వచ్చే పర్యాటకులను ఆకర్షించేందుకు ఉద్యానవన శాఖ ఆధ్వర్యంలో ప్రత్యేక ఫ్లవర్‌ షోలు నిర్వహిస్తారు.

రెండో సీజన్‌ను దృష్టిలో పెట్టుకుని ఊటీ బొటానికల్‌ గార్డెన్‌ ప్రవేశద్వారం, జపాన్‌ పార్కు తదితర ప్రాంతాల్లో నాలుగు లక్షలకు పైగా పూలమొక్కలను పెంచుతున్నారు. జపాన్‌ పార్కులో వివిధ రంగుల పుష్పాలతో ‘ఐ లవ్‌ ఊటీ’ అనే ఆకారంలో ప్రత్యేక పూల అలంకరణను సిద్ధం చేశారు. మొత్తం 35 వేలకుపైగా పూలకుండీల్లో మొక్కలను పెంచుతున్నారు. ప్రస్తుతం వాటిలో పుష్పాలు అందంగా వికసించడంతో గార్డెన్‌ మరింత ఆకర్షణీయంగా మారింది. దసరా సెలవులు సమీపిస్తున్న నేపథ్యంలో నీలగిరి జిల్లాకు పర్యాటకుల రాక మరింత పెరిగే అవకాశం ఉందని ఉద్యానవన శాఖ అధికారులు భావిస్తున్నారు.