డ్రైవర్ నిర్లక్ష్యమే కారణమా? హెచ్చరికలు పట్టించుకోకపోవడంతో బస్సులో మంటలు

గ్రేటర్ నోయిడాలో బుధవారం అర్ధరాత్రి యమునా ఎక్స్‌ప్రెస్‌వేపై ఘోర బస్సు ప్రమాదం చోటుచేసుకుంది. ప్రయాణంలో ఉన్న స్లీపర్ బస్సులో ఒక్కసారిగా మంటలు చెలరేగి నిమిషాల వ్యవధిలోనే వాహనం మొత్తం వ్యాపించాయి. ఈ ఘటనలో ఒక మహిళ సహా తొమ్మిది మంది మృతి చెందారు. కొందరు ప్రయాణికులు బస్సు నుంచి దూకి ప్రాణాలు కాపాడుకోగా, మరికొందరు మంటల్లో చిక్కుకున్నారు. షార్ట్‌ సర్క్యూట్‌ కారణంగా ప్రమాదం జరిగి ఉండొచ్చని తొలుత అనుమానించగా, డ్రైవర్‌, కండక్టర్‌ను పోలీసులు అదుపులోకి తీసుకున్నారు.

ఎఫ్‌ఐఆర్‌ ప్రకారం.. బస్సు సుమారు 33 కిలోమీటర్లు ప్రయాణించిన తర్వాత డ్రైవర్‌ క్యాబిన్‌ నుంచి పొగ రావడాన్ని ప్రయాణికులు గుర్తించారు. కాలిన వాసన వస్తోందని డ్రైవర్‌, కండక్టర్‌ను అప్రమత్తం చేసినప్పటికీ బస్సును ఆపి తనిఖీ చేయలేదని ఆరోపణలు ఉన్నాయి. కొద్దిసేపటికే డ్రైవర్‌ సీటు వద్ద మంటలు చెలరేగి బస్సు అంతటా వేగంగా వ్యాపించాయి. బస్సు యజమాని మధ్యప్రదేశ్‌కు చెందిన వ్యక్తిగా పోలీసులు గుర్తించారు. ఘటనపై ప్రధాని నరేంద్ర మోదీ దిగ్భ్రాంతి వ్యక్తం చేసి, మృతుల కుటుంబాలకు రూ.2 లక్షలు, గాయపడిన వారికి రూ.50 వేల పరిహారం ప్రకటించారు. ప్రమాదానికి గురైన బస్సుపై రూ.1.75 లక్షల చలాన్లు పెండింగ్‌లో ఉన్నట్లు సమాచారం.