అమరావతిలో శాశ్వత పాన్‌ ఐఐటీ కౌన్సిల్‌.. చంద్రబాబు కీలక ప్రకటన

అమరావతిలో ఏపీ ప్రభుత్వం, పాన్‌ ఐఐటీ అలుమ్ని ఇండియా సంయుక్తంగా శాశ్వత పాన్‌ ఐఐటీ కౌన్సిల్‌ను ఏర్పాటు చేయనున్నట్లు ముఖ్యమంత్రి చంద్రబాబు నాయుడు తెలిపారు. విజయవాడలో జరిగిన పాన్‌ ఐఐటీ ఏపీ సమిట్‌-2026 ముగింపు కార్యక్రమంలో ఆయన మాట్లాడుతూ.. దేశంలోని 23 ఐఐటీలకు చెందిన మేధావులు అమరావతికి రావడం రాష్ట్రానికి బ్రాండ్‌ ఇమేజ్‌ను తీసుకొస్తుందని అన్నారు. పరిశ్రమలు, విద్యాసంస్థలు, ప్రభుత్వం కలిసి పనిచేస్తే స్వర్ణాంధ్ర లక్ష్యాన్ని వేగంగా సాధించవచ్చని పేర్కొన్నారు. స్టార్టప్‌లు, ఆవిష్కరణలకు ప్రోత్సాహం అందించేందుకు రూ.500 కోట్ల పాన్‌ ఐఐటీ అమరావతి వెంచర్‌ ఫండ్‌ ఏర్పాటు చేయనున్నట్లు తెలిపారు.

ఏపీ నుంచి 50 లక్షల మంది ఏఐ నిపుణులను తయారు చేయడం లక్ష్యంగా పెట్టుకున్నామని చంద్రబాబు వెల్లడించారు. వచ్చే ఏడాది నుంచి ఆరో తరగతి నుంచే పాఠశాలల్లో ఏఐ సిలబస్‌, ఆంత్రప్రెన్యూర్‌ నైపుణ్యాలను ప్రవేశపెడతామని చెప్పారు. అమరావతిలో వచ్చే ఏడాది ఫిబ్రవరి నుంచి క్వాంటమ్‌ కంప్యూటర్‌ ఆపరేషన్స్‌ ప్రారంభమవుతాయని, రెండేళ్లలో కమర్షియల్‌ క్వాంటమ్‌ కంప్యూటర్ల ఉత్పత్తి దిశగా అడుగులు వేస్తామని తెలిపారు. పాన్‌ ఐఐటీ అమరావతి కౌన్సిల్‌ను డీప్‌టెక్‌ అభివృద్ధికి నోడల్‌ సంస్థగా తీర్చిదిద్దడం, 100 మంది ఐఐటీ నిపుణులతో గ్లోబల్‌ మెంటార్‌ నెట్‌వర్క్‌, 10 ఇండస్ట్రీ చైర్లు, 2030 నాటికి కనీసం 50 స్టార్టప్‌లు, ఇంక్యుబేషన్‌ కేంద్రాల ఏర్పాటుకు డిక్లరేషన్‌లో నిర్ణయాలు తీసుకున్నారు.