హైదరాబాద్‌లో ‘పింక్ పవర్ రన్ 3.0’కు భారీ స్పందన..

హైదరాబాద్‌లో ‘పింక్ పవర్ రన్ 3.0’ మూడో ఎడిషన్‌కు భారీ స్పందన లభించింది. మేఘా ఇంజినీరింగ్ అండ్ ఇన్‌ఫ్రాస్ట్రక్చర్స్ లిమిటెడ్ (MEIL), సుధా రెడ్డి ఫౌండేషన్ సంయుక్తంగా నిర్వహించిన ఈ కార్యక్రమంలో హుస్సేన్‌సాగర్ తీరంలోని హెచ్‌ఎండీఏ గ్రౌండ్స్ వద్ద 35 వేల మందికి పైగా పాల్గొన్నారు. రొమ్ము క్యాన్సర్‌పై అవగాహన, ముందస్తు గుర్తింపు ప్రాధాన్యం, మహిళల ఆరోగ్యం, ఫిట్‌నెస్‌పై చైతన్యం కల్పించడమే ప్రధాన ఉద్దేశంగా కార్యక్రమం సాగింది. 21కే హాఫ్ మారథాన్, 10కే, 5కే, 3కే విభాగాల్లో పరుగులు నిర్వహించారు. చిన్నారుల నుంచి వృద్ధులు, దివ్యాంగుల వరకు వివిధ వర్గాలకు చెందిన వారు ఉత్సాహంగా పాల్గొన్నారు. 21కే హాఫ్ మారథాన్‌లో అమెరికా, ఇంగ్లాండ్, యూఏఈ, ఇథియోపియా, ఉగాండా, శ్రీలంక, ఐస్‌లాండ్, టాంజానియా, బోట్స్వానా, కెన్యా, కెనడా తదితర దేశాల నుంచి రన్నర్లు పాల్గొన్నారు.

తెలంగాణ మంత్రి దనసరి అనసూయ (సీతక్క), డీజీపీ సీవీ ఆనంద్, ఎంఈఐఎల్ గ్రూప్ మేనేజింగ్ డైరెక్టర్ పీవీ కృష్ణారెడ్డి, సుధా రెడ్డి ఫౌండేషన్ వ్యవస్థాపకురాలు సుధా రెడ్డి తదితరులు రన్‌ను ప్రారంభించారు. సినీ నటుడు సిద్దు జొన్నలగడ్డ, మాజీ ప్రపంచ సుందరి ఓపల్ సుచేత, ప్రొఫెషనల్ బాక్సర్ విజేందర్ సింగ్ తదితరులు పాల్గొని రన్నర్లలో ఉత్సాహం నింపారు. వివిధ విభాగాల్లో విజేతలకు మొత్తం రూ.75 లక్షల నగదు బహుమతులు అందించారు. 21కే హాఫ్ మారథాన్‌లో పురుషుల విభాగంలో సునీల్ కుమార్, మహిళల విభాగంలో సోనమ్ విజేతలుగా నిలిచారు. 10కేలో హరీష్ షరీన్, వందన పటేల్, 5కేలో లవ్ చౌధరి, అంజలి తొలి స్థానాలు సాధించారు. సంగీత దర్శకుడు ఎస్‌.ఎస్‌. థమన్ లైవ్ మ్యూజిక్ కార్యక్రమంతో రన్నర్లలో మరింత ఉత్సాహం నింపారు. హైదరాబాద్‌లోని అమెరికా కాన్సులేట్ జనరల్ లారా విలియమ్స్ కూడా 10కే రన్‌లో పాల్గొన్నారు.