ప్రేమానంద్ మహారాజ్ శిష్యుడి అనుమానాస్పద మృతి

మథురలోని బృందావన్‌లో ఆధ్యాత్మిక వేత్త ప్రేమానంద్ మహారాజ్‌కు చెందిన గురుకృపా కుంజ్ ఆశ్రమంలో విషాద ఘటన చోటుచేసుకుంది. ఆశ్రమం నాలుగో అంతస్తు నుంచి కిందపడిన ఆయన శిష్యుడు మృతి చెందారు. మృతుడిని మధ్యప్రదేశ్‌లోని జబల్‌పూర్‌కు చెందిన దీపక్ లోధీగా గుర్తించారు. ఆశ్రమంలో ఆయన రసిక్ దులారీ శరణ్ పేరుతో ఉంటున్నట్లు పోలీసులు తెలిపారు. ఉదయం సుమారు 10:30 గంటల సమయంలో ఘటన జరగగా, తీవ్ర గాయాలతో ఆయనను స్థానిక ఆసుపత్రికి తరలించారు. అక్కడ చికిత్స పొందుతూ మృతి చెందారు.

ఘటనపై పోలీసులు దర్యాప్తు ప్రారంభించారు. ఫోరెన్సిక్ బృందం ఘటనా స్థలాన్ని పరిశీలించి ఆధారాలను సేకరించింది. మృతదేహాన్ని పోస్టుమార్టం నిమిత్తం తరలించారు. ప్రాథమిక దర్యాప్తులో ఆత్మహత్యకు సంబంధించిన అనుమానాలు వ్యక్తమవుతున్నప్పటికీ, ఇతర కోణాల్లోనూ విచారణ కొనసాగుతోందని పోలీసులు తెలిపారు. పోస్టుమార్టం నివేదిక, తదుపరి దర్యాప్తు పూర్తయిన తర్వాతే మృతికి ఖచ్చితమైన కారణం వెల్లడయ్యే అవకాశం ఉంది.