SIR, ఓటర్ల జాబితాపై కాంగ్రెస్‌ ఆరోపణలకు రామచంద్రరావు కౌంటర్

ఎన్నికల సంఘం, ఫారమ్‌-6, ఫారమ్‌-7, ఓటర్ల జాబితా ప్రత్యేక సమగ్ర సవరణ (SIR)పై కాంగ్రెస్‌ నేతలు చేస్తున్న ఆరోపణలపై తెలంగాణ బీజేపీ అధ్యక్షుడు ఎన్‌. రామచంద్రరావు స్పందించారు. హైదరాబాద్‌లోని బీజేపీ రాష్ట్ర కార్యాలయంలో ఆయన కాంగ్రెస్‌, రాహుల్‌ గాంధీ తీరును విమర్శించారు. ఫారమ్‌-6 ఓటరుగా నమోదు చేసుకునేందుకు ఉపయోగించే ప్రక్రియ మాత్రమేనని, ఫారమ్‌-7 దాఖలు చేసినంత మాత్రాన ఓటు తొలగింపు జరగదని తెలిపారు. ఓటర్ల జాబితాలో మార్పులు, తొలగింపులకు నిర్దిష్ట పరిశీలన ప్రక్రియ ఉంటుందని బీజేపీ వాదిస్తోంది.

ఓటర్ల తొలగింపు, ఈవీఎంలు, ఎన్నికల సంఘం పనితీరుపై కాంగ్రెస్‌ చేస్తున్న ఆరోపణలకు ఆధారాలు చూపాలని రామచంద్రరావు డిమాండ్‌ చేశారు. గతంలో నకిలీ, డూప్లికేట్‌, అనర్హుల పేర్లను ఓటర్ల జాబితా నుంచి తొలగించాలని కాంగ్రెస్‌ నేతలు చేసిన వ్యాఖ్యలను ఆయన ప్రస్తావించారు. మరోవైపు తెలంగాణలో SIR ప్రక్రియ, ఫారమ్‌-7 దుర్వినియోగంపై కాంగ్రెస్‌ ఫిర్యాదులు చేయడంతో ఈ అంశంపై రాజకీయ వివాదం కొనసాగుతోంది. ఫారమ్‌-7 దరఖాస్తులపై వచ్చిన ఫిర్యాదులను పరిశీలించాలని ఎన్నికల అధికారులు కూడా ఆదేశాలు జారీ చేశారు.