మార్కాపురం రైల్వే స్టేషన్‌లో ఎక్సైజ్ అధికారుల తనిఖీలు.. అక్రమ మద్యం, గంజాయిపై నిఘా!

స్థానిక సంస్థల ఎన్నికల నేపథ్యంలో ఇతర రాష్ట్రాల నుంచి పన్ను చెల్లించని మద్యం, గంజాయిని అక్రమంగా తరలించకుండా అడ్డుకునేందుకు సోమవారం మార్కాపురం రైల్వే స్టేషన్‌లో ప్రత్యేక తనిఖీలు నిర్వహించారు. విజయవాడ డైరెక్టర్ ఆఫ్ ఎన్‌ఫోర్స్‌మెంట్ ఆదేశాల మేరకు మార్కాపురం ప్రొహిబిషన్ అండ్ ఎక్సైజ్ ఇన్‌స్పెక్టర్ (ఇన్‌చార్జి) కొండారెడ్డి పర్యవేక్షణలో ఈ తనిఖీలు జరిగాయి. విజయవాడ ఎస్‌టీఎఫ్, ఒంగోలు ఎన్‌ఫోర్స్‌మెంట్, మార్కాపురం ఈఎస్‌టీఎఫ్, ప్రొహిబిషన్ అండ్ ఎక్సైజ్ శాఖ, రైల్వే ప్రొటెక్షన్ ఫోర్స్ (ఆర్‌పీఎఫ్) బృందాలు సంయుక్తంగా పాల్గొన్నాయి.

మార్కాపురం స్టేషన్‌కు చేరుకున్న ప్రశాంతి, కొండవీడు, కాచిగూడ, నర్సాపూర్ ఎక్స్‌ప్రెస్ రైళ్లలో ప్రయాణికులు, వారి సామగ్రిని క్షుణ్ణంగా తనిఖీ చేశారు. ఈ తనిఖీల్లో అక్రమ మద్యం బాటిళ్లు లేదా గంజాయి లభించలేదని అధికారులు వెల్లడించారు. ఎన్నికల నియమావళికి విరుద్ధంగా మద్యం, గంజాయి తరలించరాదని, అనుమతించిన పరిమితికి మించి నగదు లేదా మద్యం తీసుకెళ్లకూడదని ప్రయాణికులకు సూచించారు. నిబంధనలు ఉల్లంఘించిన వారిపై చట్టప్రకారం చర్యలు తీసుకుంటామని ఇన్‌స్పెక్టర్ కొండారెడ్డి హెచ్చరించారు.