ఢిల్లీ నిరసనలపై సుప్రీంకోర్టు కీలక ఆదేశాలు.. కేంద్రం, పోలీసులకు నోటీసులు

దేశ రాజధాని ఢిల్లీలో సుదీర్ఘకాలంగా కొనసాగుతున్న నిరసనల వల్ల తమ వ్యాపారాలు తీవ్రంగా దెబ్బతింటున్నాయని ఆరోపిస్తూ అక్కడి వ్యాపార సంఘాలు సుప్రీంకోర్టును ఆశ్రయించాయి. ముఖ్యంగా పండుగల సీజన్‌లో కన్నాట్ ప్లేస్ (సీపీ) పరిసర ప్రాంతాల్లో జరిగిన ఆందోళనల కారణంగా వ్యాపార కార్యకలాపాలు నిలిచిపోయాయని, సుమారు 50 లక్షల మంది ప్రజలు ఇబ్బందులు ఎదుర్కొన్నారని పిటిషన్‌లో పేర్కొన్నాయి. ఈ పిటిషన్‌పై మంగళవారం విచారణ చేపట్టిన సుప్రీంకోర్టు కేంద్ర ప్రభుత్వం, ఢిల్లీ పోలీసులకు నోటీసులు జారీ చేసింది.

విచారణ సందర్భంగా నిరసనకారులు, ఆందోళనలను నిర్వహిస్తున్న వారిని కూడా పిటిషన్‌లో ప్రతివాదులుగా చేర్చాలని ధర్మాసనం ఆదేశించింది. వారిని కేసులో భాగస్వాములుగా చేయకుండా తగిన ఆదేశాలు జారీ చేయలేమని స్పష్టం చేసింది. ప్రజాస్వామ్యంలో నిరసన తెలిపే హక్కు అందరికీ ఉంటుందని, అయితే ఇతరుల హక్కులు, ఇబ్బందులను కూడా గుర్తించాలని వ్యాఖ్యానించింది. ప్రాథమిక హక్కుల పేరుతో బహిరంగ ప్రదేశాలను నిరవధికంగా ఆక్రమించలేరని పేర్కొంది. సామూహిక నిర్బంధాలు, పోలీసుల బలప్రయోగం, మెట్రో స్టేషన్ల మూసివేత, ఇంటర్నెట్ సేవల నిలిపివేతకు సంబంధించిన ఇతర పిటిషన్లను కూడా ధర్మాసనం విచారించింది.