మళ్లీ ఆసియాలోనే అత్యంత ధనవంతుడిగా ముకేశ్ అంబానీ

రిలయన్స్ ఇండస్ట్రీస్ అధినేత ముకేశ్ అంబానీ మరోసారి ఆసియాలోనే అత్యంత ధనవంతుడిగా నిలిచారు. ఫోర్బ్స్ రియల్ టైమ్ బిలియనీర్ల జాబితా ప్రకారం.. ఆయన సంపద ఒక్కరోజులో 8 బిలియన్ డాలర్లు పెరిగి, మొత్తం నికర ఆస్తుల విలువ 88.3 బిలియన్ డాలర్లకు చేరుకుంది. జియో ప్లాట్‌ఫామ్స్ లిస్టింగ్ తర్వాత రిలయన్స్ ఇండస్ట్రీస్ షేర్లు భారీగా పుంజుకోవడం ఈ పెరుగుదలకు ప్రధాన కారణంగా నిలిచింది. 2020 తర్వాత రిలయన్స్ షేర్లలో నమోదైన అతిపెద్ద ఒకరోజు లాభం ఇదేనని నివేదిక పేర్కొంది. దీంతో అంబానీ ఒక్కరోజులో అత్యధికంగా సంపద పెంచుకున్న ప్రపంచ బిలియనీర్లలో రెండో స్థానంలో నిలిచారు. బైట్‌డ్యాన్స్ వ్యవస్థాపకుడు జంగ్ యిమింగ్ 84 బిలియన్ డాలర్లతో ఆసియాలో రెండో స్థానంలో ఉండగా, గౌతమ్ అదానీ 79.1 బిలియన్ డాలర్లతో మూడో స్థానంలో కొనసాగుతున్నారు.

ప్రపంచ బిలియనీర్ల జాబితాలో ఎలాన్ మస్క్ 878.5 బిలియన్ డాలర్ల సంపదతో అగ్రస్థానంలో కొనసాగుతున్నారు. జెఫ్ బెజోస్ 366 బిలియన్ డాలర్లతో రెండో స్థానంలో, లారీ పేజ్ 232.3 బిలియన్ డాలర్లతో మూడో స్థానంలో ఉన్నారు. మైఖేల్ డెల్, సెర్గీ బ్రిన్ తర్వాతి స్థానాల్లో నిలిచారు. మరోవైపు, ఒక్కరోజులో సంపద పెరుగుదలలో మస్క్ 10 బిలియన్ డాలర్ల లాభంతో మొదటి స్థానంలో ఉండగా, అంబానీ 8 బిలియన్ డాలర్ల పెరుగుదలతో రెండో స్థానంలో నిలిచారు. అయితే అదే సమయంలో లారీ ఎల్లిసన్ సంపద 11.9 బిలియన్ డాలర్లు తగ్గగా, మైఖేల్ డెల్ 9.9 బిలియన్ డాలర్లు కోల్పోయారు. స్టాక్ మార్కెట్‌లోని హెచ్చుతగ్గులు ప్రపంచ కుబేరుల సంపదపై ఎంతటి ప్రభావం చూపుతాయో ఈ మార్పులు వెల్లడిస్తున్నాయి.