దీపావళి టపాసులపై సుప్రీంకోర్టు కీలక వ్యాఖ్యలు..

దీపావళి నేపథ్యంలో టపాసుల వినియోగంపై సుప్రీంకోర్టు కీలక వ్యాఖ్యలు చేసింది. టపాసులపై పూర్తిస్థాయి నిషేధం విధించే ఉద్దేశం లేదని, అదే సమయంలో రోజంతా టపాసులు కాల్చేందుకు అనుమతించబోమని స్పష్టం చేసింది. ప్రజల మనోభావాలను గౌరవిస్తూనే.. వాయు కాలుష్యం, పర్యావరణంపై ప్రభావాన్ని దృష్టిలో ఉంచుకుని సమతుల్య విధానం అవసరమని జస్టిస్‌ ఎం.ఎం. సుంద్రేశ్‌, జస్టిస్‌ పి.బి. వరాలేతో కూడిన ధర్మాసనం పేర్కొంది.

అనుమతించే టపాసుల రకాలు, వాటిని కాల్చేందుకు నిర్దిష్ట సమయాలను నిర్ణయించే అవకాశం ఉందని కోర్టు తెలిపింది. ముఖ్యంగా చిన్నారులు, వృద్ధులు, అనారోగ్యంతో బాధపడుతున్నవారిపై టపాసుల ప్రభావాన్ని పరిగణనలోకి తీసుకోవాల్సి ఉంటుందని పేర్కొంది. బేరియం కలిగిన టపాసులపై మరింత సమాచారం అందిన తర్వాత అనుమతించే టపాసుల విషయంలో స్పష్టత వచ్చే అవకాశం ఉంది.