మందుల ధరల వ్యత్యాసంపై సుప్రీంకోర్టు ఆగ్రహం

క్యాన్సర్‌ మందులతో పాటు ఇతర ఔషధాల ఎమ్మార్పీ, రిటైల్‌ ధరల మధ్య భారీ వ్యత్యాసంపై సుప్రీంకోర్టు ఆందోళన వ్యక్తం చేసింది. మందుల ధరలను నియంత్రించే విషయంలో అన్ని ఔషధాలకు ఒకే విధమైన నిబంధన ఎందుకు తీసుకురాకూడదని కేంద్ర ప్రభుత్వాన్ని ప్రశ్నించింది. ఎమ్మార్పీపై 16 శాతానికి మించి మార్జిన్‌ ఉండకుండా నిబంధన విధించే అంశాన్ని పరిశీలించాలని సూచించింది. విచారణ సందర్భంగా సుమారు రూ.27,000 ఎమ్మార్పీ ఉన్న ఓ క్యాన్సర్‌ మందు రిటైలర్‌కు దాదాపు రూ.3,000కే లభిస్తోందని ధర్మాసనం ప్రస్తావించింది. ధరల్లో ఇంత భారీ వ్యత్యాసం ఎందుకు ఉందని ప్రశ్నించింది.

కార్పొరేట్‌ ఆస్పత్రులు రోగులను తమ ఇన్‌హౌస్‌ ఫార్మసీల నుంచే మందులు కొనుగోలు చేయాలని ఒత్తిడి చేస్తున్న అంశాన్ని కూడా కోర్టు ప్రస్తావించింది. ప్రభుత్వ ఆరోగ్య పథకాల కింద ఇలాంటి మందులకు అధిక ధరల ఆధారంగా చెల్లింపులు జరిగితే, ఆ అదనపు భారం చివరకు పన్ను చెల్లింపుదారులపై పడుతుందని పేర్కొంది. కేంద్రం తరఫున హాజరైన సొలిసిటర్‌ జనరల్‌ తుషార్‌ మెహతా సమస్యకు సమతుల్య పరిష్కారం కనుగొనాల్సి ఉంటుందని తెలిపారు. తదుపరి విచారణను అక్టోబర్‌ 12కి వాయిదా వేసింది.