తనిష్క్‌ నగల చోరీ కేసులో ఇన్‌స్టా ఇన్‌ఫ్లుయెన్సర్‌ అరెస్ట్‌..

మదురై బైపాస్‌ రోడ్డులోని కొత్తగా ప్రారంభించిన తనిష్క్‌ నగల దుకాణంలో జరిగిన భారీ చోరీ కేసులో పోలీసులు ఇద్దరిని అరెస్టు చేశారు. వీరిలో ప్రముఖ యూట్యూబర్‌, ఇన్‌స్టాగ్రామ్‌ ఇన్‌ఫ్లుయెన్సర్‌ మీనాక్షి కూడా ఉన్నారు. ఈ నెల 12వ తేదీ తెల్లవారుజామున దుకాణంలో సుమారు 15 కిలోల నగలు చోరీకి గురయ్యాయి. నగలతో దుండగుడు పారిపోతున్న సీసీటీవీ దృశ్యాలను పరిశీలించిన పోలీసులు దర్యాప్తు చేపట్టారు. నిందితుడు ఈ నెల 5వ తేదీ రాత్రి దుకాణం వెనుకవైపు నుంచి మేడపైకి వెళ్లి రెక్కీ నిర్వహించినట్లు, ఆ తర్వాత పలుమార్లు వినియోగదారుడి ముసుగులో దుకాణానికి వచ్చినట్లు గుర్తించారు. ఈ క్రమంలో మదురైలోని పళంగానత్తంకు చెందిన పట్టభద్రుడు, యూట్యూబర్‌ నిషాంత్‌ కృష్ణన్‌ ఇంట్లో శుక్రవారం సాయంత్రం పోలీసులు తనిఖీలు చేపట్టారు. అతను ఇంట్లో లేకపోవడంతో తల్లిదండ్రులను విచారించారు. దాదాపు 15 గంటలపాటు ఈ తనిఖీలు కొనసాగాయి.

ఇదిలా ఉండగా, నిషాంత్‌ కృష్ణన్‌ గురువారం ఆటోలో ఓ పొలానికి వచ్చి, తన వెంట తెచ్చుకున్న సంచిలోని దుస్తులను కాల్చివేసినట్లు స్థానికులు పోలీసులకు సమాచారం ఇచ్చారు. దీంతో మదురైలోని మాడక్కుళం చెరువు పరిసరాల్లో పోలీసులు తనిఖీలు నిర్వహించారు. ఈ కేసు దర్యాప్తులో భాగంగా నిషాంత్‌ కృష్ణన్‌ స్నేహితురాలు, ప్రముఖ యూట్యూబర్‌, ఇన్‌స్టాగ్రామ్‌ ఇన్‌ఫ్లుయెన్సర్‌ మీనాక్షితో పాటు అతడి తండ్రి సురేష్‌ను అరెస్టు చేశారు. వారి నుంచి 6 కిలోల చోరీకి గురైన నగలను స్వాధీనం చేసుకున్నారు. మిగిలిన నగలను ఎక్కడ దాచారనే విషయంపై పోలీసులు విచారణ కొనసాగిస్తున్నారు.